Jetisý oblysynyń ákimi Beibit Isabaev I. Jansúgirov atyndaǵy Jetisý ýniversitetine arnaiy kelip, stýdent jastarmen alǵash ret keń formattaǵy ashyq kezdesý ótkizdi, dep habarlaidy dalanews.kz.
Kezdesý aldynda óńir basshysy ýniversitettiń jas ǵalymdary men ónertapqysh stýdentteriniń ǵylymi jobalar kórmesimen tanysyp, olardyń zertteý jumystary men innovatsiialyq bastamalaryn joǵary baǵalady. Ásirese ǵylym men tehnologiiany ushtastyrǵan tyń ideialarǵa qyzyǵýshylyq tanytyp, jastardyń izdenisi óńirdiń intellektýaldyq áleýetin arttyratyn mańyzdy kúsh ekenin atap ótti.
Ashyq dialog barysynda oblys ákimi jastarmen qoǵam mádenieti, bilim men rýhaniiat, azamattyq sana, quqyqtyq jáne aqparattyq mádeniet, parasat pen jaýapkershilik taqyryptarynda áńgimelesti.
Óńir basshysy Qasym-Jomart Toqaevtyń «Altyn Orda – dala órkenietiniń úlgisi: tarih, arheologiia, mádeniet, biregeilik» halyqaralyq simpoziýmynda kótergen oilaryna toqtalyp, jastardyń tarihi sanasyn qalyptastyrýda tól tarihty bilý erekshe mánge ie ekenin aitty.
Sondai-aq Ál-Farabidiń «Qaiyrymdy qala turǵyndary» traktatyndaǵy izgi qoǵam tujyrymdamasyn, Abai Qunanbaiulynyń «Tolyq adam» ilimi men bilimniń qundylyǵy týraly oilaryn keńinen talqylady. Áńgime barysynda «Adal adam» qaǵidatynyń mánine erekshe toqtalyp, qoǵamnyń damýy ár azamattyń ishki mádenieti men adaldyq qundylyqtarynan bastalatynyn jetkizdi. Qoja Ahmet Iasaýi iliminiń adamdy qarapaiymdylyqqa, sabyrlylyqqa, qanaǵatshyldyq pen ishki mádenietke tárbieleýdegi orny týraly taǵylymdy oilar aityldy.
Oblys ákimi «Zań men tártip» qaǵidatynyń mańyzyn da erekshe atap ótti. Bul ustanym tek quqyq qorǵaý salasynyń emes, árbir azamattyń ómirlik ustanymy men qoǵamdyq jaýapkershiliginiń negizi bolýy qajet ekenin aitty.
«Prezident Qasym-Jomart Toqaev: «Zań men tártip – turaqty memlekettiń negizi» dedi. Atalǵan uǵym tek quqyq qorǵaý organdaryna qatysty emes. Ol eń aldymen kúndelikti ómirdegi tártip, ortadaǵy mádeniet, ózgeni syilaý, ár azamattyń azamattyq ustanymyna qatysty. Tártip adamnyń ózinen bastalady. Ol qoǵamdyq orynda ózin ustai bilý, ýaqytty baǵalaý, ózgelerge qurmet kórsetý, ortaq múlikke janashyrlyqpen qaraýdan baiqalady», - dedi ákim óz sózinde.
Tsifrlandyrý men jasandy intellekt taqyrybyna da erekshe nazar aýdardy. Jastar bolashaqta tehnologiiany meńgerýmen qatar syni oilai alatyn, jańa ortaǵa beiimdeletin ári ulttyq qundylyqtardy saqtai biletin tulǵa bolýy kerek degen oiyn aitty.
Kezdesý barysynda oblys ákimi Birikken Ulttar Uiymy Qasym-Jomart Toqaevtyń usynysymen 2026 jyldy «Turaqty damý maqsatyndaǵy Halyqaralyq volonterler jyly» dep jariialaǵanyn atap ótip, osy baǵytta óńirde júzege asyrylatyn bastamalarǵa toqtaldy.
«Aldaǵy ýaqytta óńirde sheteldik eriktilermen bailanysty kúsheitý josparda bar. Aldaǵy ýaqytta Jetisýǵa ártúrli memleketterden volonterler shaqyryp, tarihi-mádeni kerýen formatyndaǵy halyqaralyq jobalar uiymdastyrý kózdelýde. Osy arqyly Jetisýdiń tabiǵatyn, tarihi oryndaryn, ulttyq mádenietin, týristik áleýetin álemge tanyta alamyz. Mundai jobalar jastardyń dúnietanymyn keńeitedi ári halyqaralyq bailanys ornatýǵa múmkindik beredi», - dedi Beibit Óksikbaiuly.
Kezdesý sońynda stýdentter adami qundylyqtar, memlekettik qyzmet, áleýmettik qoldaý jáne óńirdiń damý baǵytyna qatysty óz saýaldaryn qoiyp, oblys ákiminen ashyq ári jan-jaqty jaýap aldy.
