Qyzylorda oblysynyń ákimi Nurlybek Nálibaev, Baiqońyr qalasy ákimshiliginiń basshysy Konstantin Býsygin, oblys prokýrory Rizabek Ojarov, ziialy qaýym ókilderi, ardagerlerdiń qatysýymen Baiqońyr qalasyndaǵy 250 páterlik 5 turǵyn úidi tabystaý rásimi ótti, dep habarlaidy Dalanews.kz
Rásimde aimaq basshysy jańa qonys ielerin quttyqtap, óńirdegi qurylys, ásirese, turǵyn úi qurylysynyń qarqynyn atap ótti.
«Keshe ótken Ulttyq quryltaida Memleket basshymyz Qasym-Jomart Kemeluly: «Sońǵy jyldary Qyzylorda oblysy zaman talabyna sai ósip-órkendep jatyr» dep, Cyr óńirinde atqarylǵan jumystarǵa oń baǵasyn berdi. Ulttyq quryltaidyń osydan 100 jyl buryn Alash qairatkerleriniń bastamasymen qazaq ataýy qaitarylǵan Qyzylorda qalasynda ótýi tarihi mánge ie. Memleket basshymyzdyń, Úkimettiń qoldaýymen aimaǵymyz qarqyndy qurylys alańyna ainaldy. 2022 jyldan beri 200-ge jýyq áleýmettik nysan salynyp, el igiligine berilgen. Turǵyndardy baspanamen qamtamasyz etýge baǵyttalǵan memlekettik áleýmettik saiasat nátijeli iske asýda.
Qarmaqshy aýdanynda 2023-2024 jyldary 2 mlrd. 848 mln. teńgege 207 páterlik 103 turǵyn úi satyp alynyp, kezekte turǵan azamattarǵa berildi. Ótken jyldyń sońynda Josaly kentindegi 50 páterlik 25 jańa turǵyn úidiń kiltin tabystadyq. Merdigerdiń salǵyrttyǵynan qurylysy 2021 jyly shilde aiynda bastalyp, keiin toqtap qalǵan Baiqońyr qalasyndaǵy 50 páterlik 5 turǵyn úidi aiaqtaý úshin oblystyq biýdjetten 2 mlrd. 433 mln. teńge qarjy bólindi. Turǵyn úiler ótken jyldyń sońyna taman, jeltoqsan aiynda salynyp bitti. Búgin sol páterlerdiń kiltin ózderińizge berýge jinaldyq.
Jańa qonys – igiliktiń bastaýy. Baspanalaryńyzdyń irgetasy berik, qabyrǵasy myǵym, ár otbasynyń shańyraǵy tatýlyq pen berekege toly bolǵai!», – dedi N.Nálibaev.
Jiynda aimaǵymyzdyń áleýmettik-ekonomikalyq damýyna úles qosqan azamattar Qyzylorda oblysynyń Qurmet gramotasymen, Qarmaqshy aýdanynyń, Baiqońyr qalasynyń órkendeýine eńbegi sińgen ardagerler, turǵyn úilerdi salǵan merdiger mekeme qyzmetkerleri oblys ákiminiń Alǵys hatymen marapattaldy. Konstantin Býsygin sóz sóilep, izgi tilegin jetkizdi.
Eske salaiyq, Prezidenttiń, Úkimettiń qoldaýymen, Qyzylorda oblysynyń ákimdigi Baiqońyr qalasy ákimshiligimen birlesip, qalanyń, oǵan irgeles ornalasqan Tóretam men Aqai eldi mekenderiniń áleýmettik-ekonomikalyq damýyna airyqsha mán berip keledi.
Qazirgi tańda Baiqońyr qalasynda aýqymdy infraqurylymdyq jobalar iske asyrylýda. Kópqabatty turǵyn úiler gazǵa qosyldy. Memlekettik baǵdarlamamen 50 páterlik bes turǵyn úi salynyp, jańa shaǵyn aýdan quryldy. Qalanyń 95 shaqyrym sý qubyry men 85 shaqyrym káriz jelileri qaita jańǵyrtylýda. Turǵyndardyń buqaralyq sportpen shuǵyldanýyna qajetti dene shynyqtyrý kesheni boi kóterip keledi.
Memleket basshysynyń tikelei bastamasymen qurylǵan «Qazaqstan halqyna» qoǵamdyq qorymen tyǵyz áriptestik bailanys ornatylyp, birlesken jobalar qolǵa alynǵan. Qor 12 mlrd. 851 mln. teńgege áleýmettik mańyzdy jobalardy júzege asyrýda.
