Japoniianyń Qazaqstandaǵy Elshisi Djýn Iamada, Almaty oblysynyń ákimi Marat Sultanǵazievpen eki el arasyndaǵy ekonomikalyq jáne mádeni ózara is-qimyldy damytý máselelerin talqylaityn kezdesýde, «Japoniia Qazaqstandy Ortalyq Aziiadaǵy seriktestik pen yntymaqtastyqtyń negizin quraityn memleket retinde tanidy»,- dep sóz bastady.
– Men árqashan Qazaqstan men Japoniiany baýyrlas, áriptes memleketter dep oilaimyn. Biz sizderdiń elderińizdi Ortalyq Aziiadaǵy sheshýshi el dep sanaimyz, «Kúnshyǵys eli» óz múmkinshiligin keńeitý úshin Astanada ǵana emes, Almatyda da ókildik ashýǵa nietti, - dep atap kórsetti Djýn Iamada.
Óz kezeginde Marat Sultanǵaziev birlesken jobalardyń mańyzdylyǵyna toqtaldy.
– Diplomatiialyq qarym-qatynastyń ornaǵanyna biyl 32 jyl tolypty. Osy kezeńde biz dostyq pen seriktestik rýhynda jemisti jumys isteimiz. Óńirimizde japon kapitalynyń qatysýymen eki iri óndiris orny – JTI jáne Mareven fýd Tian-Shian» ashyldy, olar búginde oblysymyzdyń negizgi salyq tóleýshileriniń biri bolyp tabylady, - dedi.
Kezdesýdegi basty taqyryp ekonomikalyq jáne mádeni yntymaqtastyqtyń keleshegi jaily boldy. Bilim berý klasterin qurý týraly jańa jbasyn josparlap otyrǵan Alataý qalasyna, Japoniia elshisi qyzyǵýshylyq tanytty. Japon tarapy oqý men innovatsiianyń biregei keńistigin qurýdaǵy tájiribesimen bólise alatyndyǵyn jetkizdi. Sonymen qatar, Almaty oblysy óz tarapynan megapolis aýmaǵynda meditsinalyq kásiporyndar men emhanalar salatyn seriktesterge, qolaily jaǵdailar men jeńildikter jasaýǵa daiyn ekenin jasyrmady.
Dástúrli túrde aýyl sharýashylyǵyna erekshe kóńil bólindi. Oblys aýylsharýashylyq ónimi boiynsha elimizdiń ekinshi oryndaǵy óńiri, sondyqtan da Japoniia naryǵyna shyǵýǵa umtylys tanytýda.
«Biz japondyq naryqqa shyǵýdy qalaimyz, biraq bul óte qiyn. Sondyqtan bizge osy máselede, ásirese Kúnshyǵys elinde qabyldanǵan joǵary sapa standarttaryn saqtaýda kómek qajet», - dedi Marat Sultanǵaziev. Djýn Iamada bul bastamany qoldap, ony óz naryǵynda ilgeriletýge kómektesýge ýáde berdi. Sonymen qatar, ol Japoniiada qazaqstandyq jylqy etiniń tanymaldylyǵy jyl saiyn artyp kele jatqanyn atap ótti.
Kezdesý barysynda Elshi óńirde jańa Toyota avtobólshekter ortalyǵynyń iske qosylǵanyn habarlady. Djýn Iamada sonymen qatar Japoniia Premer-Ministriniń Qazaqstanǵa is-saparmen kelýine yqpal jasaitynyn aitty. Onyń aitýynsha mundai sapar, Japoniianyń Qazaqstanmen jáne Ortalyq Aziianyń basqa da elderimen áriptestikti nyǵaitý jónindegi strategiiasynyń bastamasy bolýy múmkin.
Kezdesý sońynda taraptar ekijaqty qarym-qatynastardy odan ári damytýdyń jáne yntymaqtastyqtyń jańa baǵyttaryn ashýdyń mańyzdylyǵyn atap ótti, onyń ishinde Qonaev qalasynda arnaiy ekonomikalyq aimaq qurý jáne óńirdiń tamaq ónerkásibin damytýdy sóz etti. Japondyq áriptesterdiń investitsiia salýǵa jáne tájiribe almasýǵa degen qyzyǵýshylyǵy, aimaqty damytý men qazaqstandyq taýarlardyń básekege qabilettiligin arttyrýdyń mańyzdy faktory bola alatyndyǵyn meńzeidi.
