Óner dodasynyń maqsaty — án ónerin damytý, jas talant ielerin izdeý, jastar arasynda sazgerlik ónerdiń kásibi deńgeige kóterilýine jol ashý. Jastardy otansúigishtikke baýlý, ulttyq rýhta tárbieleý jáne patriottyq taqyrypta halyq arasyna, óner súier qaýymǵa keńinen nasihattaý.
Sharany Báidibek aýdanynyń ákimi Tanagózov Baqytbek Tólenuly quttyqtaý sózben ashyp berdi.
«Uly jazýshy Muhtar Áýezovtiń ózi «Shaianǵa barsań ánshimin deme» dep baǵa bergen óner men mádeniettiń ordasy Báidibek aýdanynan qanshama ánshi-sazgerler qanat qaqqany barshaǵa belgili. Qurylǵanyna 90 jyl tolǵan Báidibek aýdany áleýmettik, ekonomikalyq jaǵymen ǵana emes rýhaniiaty men mádenieti arqyly da óz ornyn ereksheledi. Tarlan talanttar men dara daryn ieleriniń dana jolyn jańa býyn da jalǵastyraryna senim mol. Barshańyzdy, aýdarýymyzdyń aitýly jylymen quttyqtaimyn. Elimiz aman, jurtymyz tynysh bolsyn! Árbir shańyraqtan bereke, qýanysh arylmasyn!», dedi aýdan basshysy.
Tórtinshi ret uiymdastyrylǵan oblystyq óner dodasyna QR eńbek sińirgen mádeniet qairatkeri Sábira Ábdiraiymova, QR Memlekettik syilyǵynyń laýreaty, opera ánshisi Talǵat Kúzenbaev, QR Mádeniet qairatkeri Ábdihan Nurmaǵanbetov, sazger-ánshi jarylqasyn Dáýletov qazylyq etti.
Baiqaýǵa óńirimizdiń aýdan, qalalarynan 19 úmitker qatysyp, Otan, týǵan jer, beibitshilik, halyqtar dostyǵy, el birligi týraly táýelsizdik jyldary jazylǵan patriottyq ánder men Báidibek aýdanynan shyqqan sazgerlerdiń shyǵarmasyn oryndady.
Qazylar alqasynyń sheshimimen bas júldege Báidibek aýdanynan «Qostura» dýeti ie bolsa, birinshi oryn Shymkent qalasynan kelgen «Samuryq» triosyna berildi. Ekinshi orynmen Almaty qalasynan kelgen «RAYYAN» toby marapattalsa, úshinshi orynǵa Shardara qalasynan Aqmaral Úsenqyzy jáne Kentaý qalasynan Aijan Tursynbekqyzy ie boldy. Sondai-aq, Báidibek aýdany ákiminiń arnaiy júldesimen Shymkent qalasynyń ánshisi Qarlyǵash Aitmahanbet, «Kórermen kózaiymy» nominatsiiasymen Otyrar aýdanynan Uljalǵas Ábildahan, «Eń jas ánshi» nominatsiiasymen báidibektik Madi Satman marapattaldy. Barsha jeńimpazdarǵa aqshalai syilyqtar jáne aýdan ákiminiń alǵys haty tabystaldy.
