Jańa jobanyń qurylysy Aqbastaý aýyldyq okrýgi aýmaǵynan ótetin Bógen ózeni boıynan júrgiziledi. Túrkistan oblysynyń ákimi Ómirzaq Shókeev Báıdibek aýdanyna barǵan jumys saparynda «Sarqyrama» sý qoımasy salynatyn orynǵa baryp, mańyzdy máseleni sala mamandarymen birge talqylady. Oblys basshysy sý qoımasynyń syıymdylyǵyn 50 mln tekshe ulǵaıtýdy usyndy.
Túrkistan oblysynyń ákimi Báıdibek aýdanyndaǵy birqatar nysandy aralap, qarıalarymen kezdesti. Sapar barysynda Myńbulaq aýyl okrýgine qarasty Qosbulaq aýylynda jańadan boı kótergen 150 oryndyq mektepte boldy. Zaman talabyna saı salynǵan nysan, bıylǵy jyldyń tamyz aıynda el ıgiligine beriledi dep kútilýde. Jańa mekteptiń qurylysy eki jyl buryn bastalǵan. 150 oryndyq mektepte balalardyń jan-jaqty oqyp-jetilýi úshin barlyq jaǵdaı jasalynatyn bolady.
Aımaq basshysy mal sharýashylyǵyn damytý boıynsha engizilgen jańa tehnologıa arqyly «Aqyldy jaıylym» jumysymen tanysty. Báıdibek aýdany Jambyl aýylyndaǵy «Molshylyq» sharýa qojalyǵy on jyldan beri mal sharýashylyǵymen aınalysady. Jaıylymdyq jerdi tıimdi paıdalanýdyń joly – aqyldy jaıylym. «Aqyldy jaıylym» jobasy aıasynda kúnnen energıa alatyn qurylǵymen energetıkalyq qorshaý jasalynǵan. Tórt túlik sol qorshaýdyń ishinde ǵana jaıylady. Bul shaǵyn jerdi birneshe bólikke bólip, maldyń kezek - kezek ornyn aýystyryp, jaıylymdyq jerdi tıimdi paıdalanýǵa múmkindik beredi.
Aýdanǵa jumys saparymen barǵan aımaq basshysy Myńbulaq eldi mekenindegi tabıǵı gaz júıesiniń qazirgi jaǵdaıyn jáne gaz qubyrlaryn júrgizý josparlarymen tanysty. Búgingi tańda aýdan aýmaǵynda ornalasqan 10 eldi meken tabıǵı gazben qamtylǵan. Sondaı-aq, bıyl qurylysy júrgizilip jatqan 7 eldi meken tabıǵı gazben qamtylady dep josparlanyp otyr.
Myńbulaq eldi mekenine 2019 jyldan beri gaz qubyrynyń qurylysy júrgizilýde.
