Onyń aitýynsha, kompaniia iskerlik bedelin qorǵaý jáne keltirilgen ziiandy ótetkizý jóninde sotqa aryz berý múmkindigin qarastyryp jatqan kórinedi.
S.Ahmetov: Eń aldymen, bizdiń kompaniianyń qurylys naryǵynda 2006 jyldan beri jumys istep kele jatqanyn atap ótkim keledi. 15 jyl ishinde biz quramyna 40-tan astam ártúrli kompaniia kiretin iri kópsalaly holding retinde qalyptastyq. Búginde merdiger uiymdardy qosa eseptegende 2 myńdai astanalyqty jumyspen qamtamasyz etip otyrmyz. Bul – otbasy múshelerimen qosa eseptegende 8 myńnan astam adam.
Tek 2020-21 jyldyń ózinde bizdiń holding 80 myń sharshy metrdi paidalanýǵa berdi, al biylǵy jyldyń sońyna deiin 40 myń sharshy metr kommertsiialyq turǵyn úidi qoldanysqa engizemiz. Klientterimiz bizdiń qoljetimdi baǵaǵa joǵary sapa usynatynymyzdy jaqsy biledi jáne baǵalaidy.
Mamaidyń «NAK» kompaniiasy» Baýyrjan Baibektiń biznes-imperiiasy», «Ahmetovter kompaniiasynda onyń qoiǵan adamy otyr» degen jalǵan málimdemeleri tolyqtai oidan shyǵarylǵan jáne oǵan eshqandai negizi joq.
Bizdiń holding pen Baýyrjan Baibektiń jáne onyń otbasy músheleriniń arasynda qandai-da bir qarjylyq nemese quryltaishylyq qarym-qatynastyń joq ekendigin jaýapkershilikpen málimdeimin.
Jalǵyz-aq, tek sonaý 2012 jyly meniń ákem Qýat Ahmetov pen Qydyrǵali Baibek Nur-Sultan qalasynda osy attas biznes-ortalyqtardy basqarý boiynsha «Nur Taý» jáne «Nurly Orda» JShS-laryn qurǵan bolatyn. Bul – eshqandai memleket qarajatyn tartpai júzege asyrylǵan kommertsiialyq jobalar.
Mamaidyń «Baibek Ahmetovterge jáne olardyń kompaniialaryna qorǵan bolyp otyr» degen sózi – aqylǵa syimaityn bos sandyraq.
Birinshiden, joǵaryda aityp ótkenimdei, bizdiń naryqta júrgenimizge kóp ýaqyt boldy jáne eshkimniń «qamqorlyǵyna» muqtaj emespiz.
Ekinshiden, Baýyrjan Baibek Almaty qalasynyń ákimi bolǵan kezde (2015-2019 jj.) sol qalada biz bir de bir jobany iske asyrmadyq, bir sharshy metr de salmadyq.
Úshinshiden, NAK holdingi – jeke kommertsiialyq uiym, ol árdaiym naryq jaǵdaiynda jumys istep keledi jáne jumys istei beredi de. Iaǵni, obektiler salý úshin jer ýchaskelerin biz naryqtan ádettegi sharttarmen satyp alamyz.
Bizdiń senimdi kompaniia degen bedelimiz bar. Biz salǵan jaily jáne biznes-sanattaǵy turǵyn úiler halyqtyń suranysyna ie.
Mamai atap ótken «Máńgilik Eldegi» jer ýchaskesine kelsem, ony Kazakhstan Capital Invest atty jeke kompaniiamen birge igerip jatyrmyz. Olar – jer ýchaskeleriniń ieleri, al biz – qosalqy investor jáne bas merdigerlermiz. Biz osy jerde qurylys júrgizip jatqanymyzdy maqtan tutamyz. Kez kelgen qurylysshy óziniń salǵan úileri elordanyń bas kóshesin kóriktendirip turǵanyn armandaidy. Bizdiń holdingimiz úshin bul – úlken synaq ári jaýapty is.
NAK – áleýmettik jaýapkershiligi joǵary kompaniia. Qiyndyqtarǵa qaramastan biz lokdaýn kezinde qyzmetkerlerimizdi qysqartpadyq jáne jalaqy tóleýdi toqtatqan joqpyz.
Elorda ákimdiginiń ótinishi boiynsha biz o basynda olardy salýǵa eshqandai qatysymyz bolmasa da 4 problemalyq úleskerlik qurylys nysanyn aiaqtaý boiynsha ózimizge mindetteme aldyq. Bular – «Asyl Taý» (burynǵy Territoriia Komforta 1), «Turan Syǵanaq» (Syǵanaq kóshesiniń boiynda), «Hazar» (burynǵy «Zagreb» TK), sondai-aq «Royal Expo» (EXPO-2017 kórme ortalyǵynyń aýmaǵyndaǵy TK) keshenderi.
Búgingi tańda aldanyp qalǵan 1,3 myń otbasy osy nysandardyń qurylysynyń bitýin kútip otyr. Bul nysandardyń bir bóligin biz jyl sońyna deiin beremiz, úleskerler kópten kútken páterleriniń kiltin alatyn bolady.
Mamai sekildilerdiń túsinýi úshin mynany aitqym keledi. Mundai problemalyq nysandardyń qurylysyn bitirýdi kim-kóringenge senip tapsyrmaidy. Buǵan qosa jurtshylyq pen quzyrly organdar da muny barynsha baǵyp otyr.
Holdingtiń basshysy retinde joǵaryda atalǵan rolik bizdiń bedelimizge ǵana emes, qarjylyq jaǵdaiymyzǵa da ziian keltirgenin málimdeimin.
Mamaidyń jónsiz soqtyǵýy tek bizge ǵana emes, sonymen qatar biz kómek kórsetip júrgen qarapaiym azamattarymyzǵa da keri áserin tigizetini ókinishti. Biz óz jeke qarajatymyzdyń esebinen asa muqtaj azamattarǵa jyl saiyn demeýshilik retinde kómek kórsetemiz. Olardyń arasynda kópbalaly analar men múgedek balalardy tárbielep otyrǵan otbasylar bar.
Osyǵan bailanysty bizdiń zańgerlerimiz qazir materialdardy zerttep, iskerlik bedelimizdi qorǵaý jáne keltirilgen ziiandy ótetkizý týraly sotqa aryz berý múmkindigin anyqtaý úshin sarapshylarmen keńesip jatyr. Osynyń barlyǵyn saralai otyryp, ne isteitinimizdi sheshetin bolamyz.
Ótirik soǵa alatyn adam jala jabý men kemsitý úshin jaýap beretinin de túsinýi tiis. Rolikterde aitylǵandardyń barlyǵy – Mamaidyń oidan shyǵarǵan dolbarlary.
