ونىڭ ايتۋىنشا، كومپانيا ىسكەرلىك بەدەلىن قورعاۋ جانە كەلتىرىلگەن زياندى وتەتكىزۋ جونىندە سوتقا ارىز بەرۋ مۇمكىندىگىن قاراستىرىپ جاتقان كورىنەدى.
س.احمەتوۆ: ەڭ الدىمەن، ءبىزدىڭ كومپانيانىڭ قۇرىلىس نارىعىندا 2006 جىلدان بەرى جۇمىس ىستەپ كەلە جاتقانىن اتاپ وتكىم كەلەدى. 15 جىل ىشىندە ءبىز قۇرامىنا 40-تان استام ءارتۇرلى كومپانيا كىرەتىن ءىرى كوپسالالى حولدينگ رەتىندە قالىپتاستىق. بۇگىندە مەردىگەر ۇيىمداردى قوسا ەسەپتەگەندە 2 مىڭداي استانالىقتى جۇمىسپەن قامتاماسىز ەتىپ وتىرمىز. بۇل – وتباسى مۇشەلەرىمەن قوسا ەسەپتەگەندە 8 مىڭنان استام ادام.
تەك 2020-21 جىلدىڭ وزىندە ءبىزدىڭ حولدينگ 80 مىڭ شارشى مەتردى پايدالانۋعا بەردى، ال بيىلعى جىلدىڭ سوڭىنا دەيىن 40 مىڭ شارشى مەتر كوممەرسيالىق تۇرعىن ءۇيدى قولدانىسقا ەنگىزەمىز. كليەنتتەرىمىز ءبىزدىڭ قولجەتىمدى باعاعا جوعارى ساپا ۇسىناتىنىمىزدى جاقسى بىلەدى جانە باعالايدى.
مامايدىڭ «NAK» كومپانياسى» باۋىرجان بايبەكتىڭ بيزنەس-يمپەرياسى»، «احمەتوۆتەر كومپانياسىندا ونىڭ قويعان ادامى وتىر» دەگەن جالعان مالىمدەمەلەرى تولىقتاي ويدان شىعارىلعان جانە وعان ەشقانداي نەگىزى جوق.
ءبىزدىڭ حولدينگ پەن باۋىرجان بايبەكتىڭ جانە ونىڭ وتباسى مۇشەلەرىنىڭ اراسىندا قانداي-دا ءبىر قارجىلىق نەمەسە قۇرىلتايشىلىق قارىم-قاتىناستىڭ جوق ەكەندىگىن جاۋاپكەرشىلىكپەن مالىمدەيمىن.
جالعىز-اق، تەك سوناۋ 2012 جىلى مەنىڭ اكەم قۋات احمەتوۆ پەن قىدىرعالي بايبەك نۇر-سۇلتان قالاسىندا وسى اتتاس بيزنەس-ورتالىقتاردى باسقارۋ بويىنشا «نۇر تاۋ» جانە «نۇرلى وردا» جشس-لارىن قۇرعان بولاتىن. بۇل – ەشقانداي مەملەكەت قاراجاتىن تارتپاي جۇزەگە اسىرىلعان كوممەرسيالىق جوبالار.
مامايدىڭ «بايبەك احمەتوۆتەرگە جانە ولاردىڭ كومپانيالارىنا قورعان بولىپ وتىر» دەگەن ءسوزى – اقىلعا سىيمايتىن بوس ساندىراق.
بىرىنشىدەن، جوعارىدا ايتىپ وتكەنىمدەي، ءبىزدىڭ نارىقتا جۇرگەنىمىزگە كوپ ۋاقىت بولدى جانە ەشكىمنىڭ «قامقورلىعىنا» مۇقتاج ەمەسپىز.
ەكىنشىدەن، باۋىرجان بايبەك الماتى قالاسىنىڭ اكىمى بولعان كەزدە (2015-2019 جج.) سول قالادا ءبىز ءبىر دە ءبىر جوبانى ىسكە اسىرمادىق، ءبىر شارشى مەتر دە سالمادىق.
ۇشىنشىدەن، NAK حولدينگى – جەكە كوممەرسيالىق ۇيىم، ول ءاردايىم نارىق جاعدايىندا جۇمىس ىستەپ كەلەدى جانە جۇمىس ىستەي بەرەدى دە. ياعني، وبەكتىلەر سالۋ ءۇشىن جەر ۋچاسكەلەرىن ءبىز نارىقتان ادەتتەگى شارتتارمەن ساتىپ الامىز.
ءبىزدىڭ سەنىمدى كومپانيا دەگەن بەدەلىمىز بار. ءبىز سالعان جايلى جانە بيزنەس-ساناتتاعى تۇرعىن ۇيلەر حالىقتىڭ سۇرانىسىنا يە.
ماماي اتاپ وتكەن «ماڭگىلىك ەلدەگى» جەر ۋچاسكەسىنە كەلسەم، ونى Kazakhstan Capital Invest اتتى جەكە كومپانيامەن بىرگە يگەرىپ جاتىرمىز. ولار – جەر ۋچاسكەلەرىنىڭ يەلەرى، ال ءبىز – قوسالقى ينۆەستور جانە باس مەردىگەرلەرمىز. ءبىز وسى جەردە قۇرىلىس جۇرگىزىپ جاتقانىمىزدى ماقتان تۇتامىز. كەز كەلگەن قۇرىلىسشى ءوزىنىڭ سالعان ۇيلەرى ەلوردانىڭ باس كوشەسىن كورىكتەندىرىپ تۇرعانىن ارماندايدى. ءبىزدىڭ حولدينگىمىز ءۇشىن بۇل – ۇلكەن سىناق ءارى جاۋاپتى ءىس.
NAK – الەۋمەتتىك جاۋاپكەرشىلىگى جوعارى كومپانيا. قيىندىقتارعا قاراماستان ءبىز لوكداۋن كەزىندە قىزمەتكەرلەرىمىزدى قىسقارتپادىق جانە جالاقى تولەۋدى توقتاتقان جوقپىز.
ەلوردا اكىمدىگىنىڭ ءوتىنىشى بويىنشا ءبىز و باسىندا ولاردى سالۋعا ەشقانداي قاتىسىمىز بولماسا دا 4 پروبلەمالىق ۇلەسكەرلىك قۇرىلىس نىسانىن اياقتاۋ بويىنشا وزىمىزگە مىندەتتەمە الدىق. بۇلار – «اسىل تاۋ» (بۇرىنعى تەرريتوريا كومفورتا 1)، «تۇران سىعاناق» (سىعاناق كوشەسىنىڭ بويىندا)، «حازار» (بۇرىنعى «زاگرەب» تك)، سونداي-اق «Royal Expo» (EXPO-2017 كورمە ورتالىعىنىڭ اۋماعىنداعى تك) كەشەندەرى.
بۇگىنگى تاڭدا الدانىپ قالعان 1،3 مىڭ وتباسى وسى نىسانداردىڭ قۇرىلىسىنىڭ ءبىتۋىن كۇتىپ وتىر. بۇل نىسانداردىڭ ءبىر بولىگىن ءبىز جىل سوڭىنا دەيىن بەرەمىز، ۇلەسكەرلەر كوپتەن كۇتكەن پاتەرلەرىنىڭ كىلتىن الاتىن بولادى.
ماماي سەكىلدىلەردىڭ ءتۇسىنۋى ءۇشىن مىنانى ايتقىم كەلەدى. مۇنداي پروبلەمالىق نىسانداردىڭ قۇرىلىسىن ءبىتىرۋدى كىم-كورىنگەنگە سەنىپ تاپسىرمايدى. بۇعان قوسا جۇرتشىلىق پەن قۇزىرلى ورگاندار دا مۇنى بارىنشا باعىپ وتىر.
حولدينگتىڭ باسشىسى رەتىندە جوعارىدا اتالعان روليك ءبىزدىڭ بەدەلىمىزگە عانا ەمەس، قارجىلىق جاعدايىمىزعا دا زيان كەلتىرگەنىن مالىمدەيمىن.
مامايدىڭ ءجونسىز سوقتىعۋى تەك بىزگە عانا ەمەس، سونىمەن قاتار ءبىز كومەك كورسەتىپ جۇرگەن قاراپايىم ازاماتتارىمىزعا دا كەرى اسەرىن تيگىزەتىنى وكىنىشتى. ءبىز ءوز جەكە قاراجاتىمىزدىڭ ەسەبىنەن اسا مۇقتاج ازاماتتارعا جىل سايىن دەمەۋشىلىك رەتىندە كومەك كورسەتەمىز. ولاردىڭ اراسىندا كوپبالالى انالار مەن مۇگەدەك بالالاردى تاربيەلەپ وتىرعان وتباسىلار بار.
وسىعان بايلانىستى ءبىزدىڭ زاڭگەرلەرىمىز ءقازىر ماتەريالداردى زەرتتەپ، ىسكەرلىك بەدەلىمىزدى قورعاۋ جانە كەلتىرىلگەن زياندى وتەتكىزۋ تۋرالى سوتقا ارىز بەرۋ مۇمكىندىگىن انىقتاۋ ءۇشىن ساراپشىلارمەن كەڭەسىپ جاتىر. وسىنىڭ بارلىعىن سارالاي وتىرىپ، نە ىستەيتىنىمىزدى شەشەتىن بولامىز.
وتىرىك سوعا الاتىن ادام جالا جابۋ مەن كەمسىتۋ ءۇشىن جاۋاپ بەرەتىنىن دە ءتۇسىنۋى ءتيىس. روليكتەردە ايتىلعانداردىڭ بارلىعى – مامايدىڭ ويدان شىعارعان دولبارلارى.
