Baiannyń ómiri kimge qyzyq? Bárine jaýap bermekshi.
Esentaeva kitap tusaýkeseriniń ne sebepti keiinge qaldyrylǵanyn túsindirdi.
«Kitapty sáýir aiynda jaryqqa shyǵarǵym kelgen. Biraq úlgermeitinimdi túsindim. Óitkeni ózgertýler engizý qajet. Sondyqtan halyqtyń júregine jetkizý úshin kishkene ýaqyt kerek. Men kitapty zeinetkerlik jasqa jetkende, qyzyl qalpaqpen teńizdiń jaǵasynda otyryp jazamyn dep josparlaǵanmyn. Biraq qoǵam meniń ómirime asa qyzyǵýshylyq tanytqandyqtan, ómirdiń ózi meni kitap jazýǵa májbúrledi. Barlyǵynyń núktesin qoiyp, qoǵamǵa ózimniń kim ekenimdi túsindiretin ýaqyt jetken siiaqty», – deidi tanymal prodiýser.
Baian Maqsatqyzy kitapta ne týraly aitatynyn da jasyrmady.
«Men adamdarǵa ózimniń tiri jan ekenimdi, áiel ekenimdi jetkizgim keledi. Meniń de basqalar sekildi aǵattyq jiberýge, baqytty bolýǵa, jaqsy kórýge nemese jaqsy kórmeýge, shalynysýǵa jáne qaita turýǵa quqyǵym bar. Sondai-aq, ózimniń jetken jetistikterim men qulaǵan sátterim, tanymaldylyǵym týraly aityp, nege bulai bolǵanyn túsindirgim keledi.
Áiel balalary, týystary, qala berdi qoǵam úshin bárine shydaýǵa májbúr. Osy kitabym arqyly men ómirdiń bir-aq ret beriletinin aitqym keledi. Erteńgi kúni balalaryń ósedi, týystaryńnyń óz ómiri bar, al qoǵamǵa shyn máninde báribir ekenin túsine bilý kerek.
Árkimniń óz ómiri bar. Sol siiaqty meniń de. Ol jiger syilaityn nemese saǵyn syndyratyn kitap bolatynyn bilmeimin. Negizi bul ashylý kitaby. Keibireýler meni túsiner, al bireýler ári qarai dattaidy», – dep túsindirdi Baian Maqsatqyzy.
Prodiýserdiń qalamger retindegi alǵashqy týyndysy mamyr aiynda jaryqqa shyǵady. Dese de oǵan áli at qoiylmaǵan kórinedi. Prodiýser jeke kitabyna at qoiý úshin oqyrmandarymen kezdeskisi keledi.
«Aitpaqshy kitabyma at qoiý úshin bir kúni oqyrmandarymmen shaǵyn nemese interaktiv uiymdastyramyn. Óitkeni ózime qiynǵa soǵýda», – dep túiindedi prodiýser.
