ەسەنتايەۆا كىتاپ تۇساۋكەسەرىنىڭ نە سەبەپتى كەيىنگە قالدىرىلعانىن ءتۇسىندىردى.
«كىتاپتى ءساۋىر ايىندا جارىققا شىعارعىم كەلگەن. ءبىراق ۇلگەرمەيتىنىمدى ءتۇسىندىم. ويتكەنى وزگەرتۋلەر ەنگىزۋ قاجەت. سوندىقتان حالىقتىڭ جۇرەگىنە جەتكىزۋ ءۇشىن كىشكەنە ۋاقىت كەرەك. مەن كىتاپتى زەينەتكەرلىك جاسقا جەتكەندە، قىزىل قالپاقپەن تەڭىزدىڭ جاعاسىندا وتىرىپ جازامىن دەپ جوسپارلاعانمىن. ءبىراق قوعام مەنىڭ ومىرىمە اسا قىزىعۋشىلىق تانىتقاندىقتان، ءومىردىڭ ءوزى مەنى كىتاپ جازۋعا ماجبۇرلەدى. بارلىعىنىڭ نۇكتەسىن قويىپ، قوعامعا ءوزىمنىڭ كىم ەكەنىمدى تۇسىندىرەتىن ۋاقىت جەتكەن سياقتى»، – دەيدى تانىمال پروديۋسەر.
بايان ماقسات قىزى كىتاپتا نە تۋرالى ايتاتىنىن دا جاسىرمادى.
«مەن ادامدارعا ءوزىمنىڭ ءتىرى جان ەكەنىمدى، ايەل ەكەنىمدى جەتكىزگىم كەلەدى. مەنىڭ دە باسقالار سەكىلدى اعاتتىق جىبەرۋگە، باقىتتى بولۋعا، جاقسى كورۋگە نەمەسە جاقسى كورمەۋگە، شالىنىسۋعا جانە قايتا تۇرۋعا قۇقىعىم بار. سونداي-اق، ءوزىمنىڭ جەتكەن جەتىستىكتەرىم مەن قۇلاعان ساتتەرىم، تانىمالدىلىعىم تۋرالى ايتىپ، نەگە بۇلاي بولعانىن تۇسىندىرگىم كەلەدى.
ايەل بالالارى، تۋىستارى، قالا بەردى قوعام ءۇشىن بارىنە شىداۋعا ءماجبۇر. وسى كىتابىم ارقىلى مەن ءومىردىڭ ءبىر-اق رەت بەرىلەتىنىن ايتقىم كەلەدى. ەرتەڭگى كۇنى بالالارىڭ وسەدى، تۋىستارىڭنىڭ ءوز ءومىرى بار، ال قوعامعا شىن مانىندە ءبارىبىر ەكەنىن تۇسىنە ءبىلۋ كەرەك.
اركىمنىڭ ءوز ءومىرى بار. سول سياقتى مەنىڭ دە. ول جىگەر سىيلايتىن نەمەسە ساعىن سىندىراتىن كىتاپ بولاتىنىن بىلمەيمىن. نەگىزى بۇل اشىلۋ كىتابى. كەيبىرەۋلەر مەنى تۇسىنەر، ال بىرەۋلەر ءارى قاراي داتتايدى»، – دەپ ءتۇسىندىردى بايان ماقسات قىزى.
پروديۋسەردىڭ قالامگەر رەتىندەگى العاشقى تۋىندىسى مامىر ايىندا جارىققا شىعادى. دەسە دە وعان ءالى ات قويىلماعان كورىنەدى. پروديۋسەر جەكە كىتابىنا ات قويۋ ءۇشىن وقىرماندارىمەن كەزدەسكىسى كەلەدى.
«ايتپاقشى كىتابىما ات قويۋ ءۇشىن ءبىر كۇنى وقىرماندارىممەن شاعىن نەمەسە ينتەراكتيۆ ۇيىمداستىرامىن. ويتكەنى وزىمە قيىنعا سوعۋدا»، – دەپ تۇيىندەدى پروديۋسەر.
