Pavlodar oblysy Baianaýyl aýdanynda «Tabiǵat aiasynda kitap oqý» taqyrybynda kitaphana ádiskerlerine jáne mektep kitaphanashylaryna arnalǵan respýblikalyq seminar ótti. Is-sharany Memleket basshysynyń bastamasymen bastaý alǵan «Oqýǵa qushtar mektep – oqýǵa qushtar ult» jobasy aiasynda QR Oqý-aǵartý ministrliginiń Respýblikalyq ǵylymi-pedagogikalyq kitaphanasy uiymdastyrǵan.
Seminar saltanatty túrde aýdandyq bilim bólimi ókilderiniń jáne Sh.Aimanov atyndaǵy jalpy orta bilim beretin mektep-internat direktorynyń quttyqtaý sózderimen ashyldy. «Kókjiek-Gorizont», «Abai», «Shuǵyla» baspalarymen qosa «SMARTKITAPHANA» mektep kitaphanashylaryn avtomattandyrý jáne tsifrlandyrý» taqyrybyndaǵy úzdik jobany «Edline» JShS biznesti damytý menedjeri Arman Ajimýhanov tanystyrdy.
Kitaphana salasyna tyń serpin bergen seminarda Baianaýyl aýdanynyń eń kórikti jerleri Sabyndykól jaǵalaýynda «Qazynaly Baianaýyldaǵy Sabyndykól jaǵalaýynda kitap oqý taqyrybynda» Astana, Almaty, Shymkent, Qaraǵandy oblystary ádiskerleri men mektep kitaphanashylary is-sharalaryn tanystyrsa, «Ańyzǵa toly tabiǵaty kórkem Jasybai kóliniń jaǵalaýynda kitap oqý» taqyrybynda Abai, Almaty, Atyraý, Jambyl, Túrkistan oblystary óz kórsetilimderin ortaǵa saldy.
«Aqbet taýynyń etegindegi Toraiǵyr kóliniń jaǵalaýynda kitap oqý» taqyrybynda óz is-tájiribelerin Batys Qazaqstan, Jetisý, Pavlodar, Ulytaý oblystary da kórsetip ótti. Kórkine kóz toiǵysyz Baianaýyl taýlarynda Qyzylorda, Soltústik Qazaqstan, Shyǵys Qazaqstan, Aqmola oblystary ádis-tásilderimen almasty.
Alǵash ret tabiǵat aiasynda ótip otyrǵan aýqymdy seminar joǵary deńgeide ótti. Nátijesinde Túrkistan oblysy júldeli I oryndy qanjyǵasyna bailady. Baianaýyl ólkesiniń saf aýasyn jutyp, tabiǵatta kitap oqýdy nasihattaý jáne Qazaqstannyń kórikti jerlerin tanytý maqsatynda ótken seminar óz jalǵasyn tabady.
