Baian qazaq áieline qandai úlgi bolady?
Psihologtyń aitýynsha, prodiýserge mundai sheshim qabyldaý ońai soqpady. – Baian hanym qazaq áielderine úlgi boldy. Eger de psihoanalizden bólek, din jaǵynan alyp qarasaq, barlyq psihoterapevt pen din qyzmetkeri adamdardy bir-birine keshirimmen qarap, beibit jolmen sheshim qabyldaýǵa shaqyrady. Menińshe, erli-zaiypty ashý men yzadan ótip, osyndai sheshimge keldi. Menińshe, mundai sheshim qabyldaý Baian hanymǵa ońai soqpady, – dedi Anna Qudiiarova.
Sondai-aq, psiholog prodiýserdiń áielderdiń quqyǵyn qorǵaý týraly raiynan qaitýy múmkin ekenin aityp ótti.
– Meniń oiymsha, onyń kúieýi alatyn jazasyn aldy. Oǵan da kóptegen jaǵymsyz pikirler men qarǵystar aityldy. Sizder umytpańyzdar, Baian hanymnyń sheshiminde ananyń balaǵa degen mahabbaty da bar. Ol qyzdarynyń ákesin keshirdi. Balalarynyń ákesin túrmege qamap tastaý degen sóz balasyna degen mahabbaty joq ekenin bildiredi. Qandai ana ondai áreketke barady?, – dep túsindirdi psiholog.
Al basqa psihologtyń aitýynsha, Baian Maqsatqyzynyń kúieýin keshirýi qazaqstandyq áielderdiń kóńilin qaldyrdy.
– Keibir áielderge Baiannyń sheshimi úlgi boldy. Ol óziniń basynan ótken oqiǵa arqyly mundai jaǵdaimen kúresip, úndemei otyra berýge bolmaitynyn kórsetti. Biraq ol qazir sotta kúieýin keshirdi. Bir jaǵynan bul zorlyq-zombylyqtyń jalǵasa beretinin kórsetetin siiaqty. Sotqa deiin kúieýimen kúresken áiel halyqqa ádildiktiń bar ekenin kórsete aldy. Biraq sońynda Baiannyń óz sózderinen ainyp, osyndai sheshim qabyldaǵany kóptiń kóńilin qaldyrdy, – dedi daǵdarys ortalyǵynyń mamany.
Sonymen qatar, advokat Djohar Ótebekov te prodiýser Baian Maqsatqyzynyń kúieýin keshirý týraly sheshiminiń sotqa qalai áser etetini jaily pikir aitty.
Sonymen qatar, advokattyń aitýynsha, Baiannyń kúieýine aitatyn eshqandai da shaǵymy joq, balalary da ákesin tolyqtai keshirgen. «Baian Maqsatqyzy qatty ýaiymdady. Kúieýin de qyzdary úshin keshirdi, sottan ony bas bostandyǵynan aiyrmaýdy surady», – dedi ol. Aita keteiik, sot otyrysynda prodiýsermen Grýziiada birge bolǵan "Lashyn" tobynyń múshelerinen de jaýap alyndy.
Eske sala keteiik, Baian Maqsatqyzy 10 maýsymda aýyr jaǵdaida Talǵardaǵy aýrýhanaǵa túsken bolatyn. Tergeýdiń málimetinshe, ony kúieýi Baqytbek Esentaev aiaýsyz uryp soǵyp, birneshe ret pyshaqtaǵan. Bul oqiǵa Eńbekshi aýylynyń mańynda Qulja tas jolynda bolǵan.
