Onyń pikirinshe bilikke súlikshe jabysqan Lýkashenko el aldyndaǵy abyroiynan jurdai boldy. Onyń endigide bilikte qansha merzimge aialdary mańyzdy emes. Belarýs diktatorynan arqasúier dástúrli elektoraty da teris ainalǵan.
"Onyń bar muraty bilikti saqtap qalý. Bilik úshin Belarýstiń táýelsizdigin tárk etip, ony Kremldiń qolyna tabystaýdan taiynbaidy. Bilik úshin eldiń egemendigin saýdalap, Pýtinniń qolbalasy bolýǵa ázir. Bul memleketke jasalǵan satqyndyq. Otanyna opasyzdyq jasaý.
Lýkashenkoǵa qazirdiń ózinde Reseidiń tisqaqqan saiasitehnologtary bolysyp, óz elinde japadan-qalǵyz "kósemdi" qutqaryp qalýǵa tyrysýda. Onyń saýsaqpen sanap alarlyq jaqtastaryn kóbeitip kórsetip, kóshbasshynyń keipine endirýde.
Minskidegi bilikshil miting bilikke qarsy myńdaǵan adam alańǵa shyqqan ereýildiń janynda úni shyqpai, jetimsirep qaldy. Lýkashenkonyń tóńiregine toptasqandardy kóbeitip kórsetkisi kelgenderdiń áýselesinen túk shyqpady", – deidi Sátpaev.
Onyń pikirinshe Lýkashenko shekten shyǵyp ketti. Kremlge jaltaqtap, Pýtinnen kómek suraýy sharasyzdyqtyń belgisi.
"Shyny kerek Kremldiń Lýkashenkony sýqany súimeidi. Degenmen dál qazirgi ýaqta Reseimen ortaq odaq qurýdy kóksep júrgen Batkany qoldaýdan ózge amaly joq.
Másele, Kreml ol úshin basyn báigege tigip, taǵy bir slavian elimen kikiljińge túsýge ázir me? Árbirden soń Reseidiń ózi ishten-syrttan jaý izdeitin Pýtinnen qajyp ketti. Kúni-túni AQSh pen Batysty, Ýkrainany balaǵattaýdan sharshamaityn zombi-jáshiktegi úgit-násihatqa toidy. Pandemiia halyqtyń qajyǵan kóńil-kúiin odan saiyn júdete tústi", – deidi Sátpaev.
Onyń paiymdaýymsha Kreml Belarýstiń ishke isine aralaspai tura, on oilanyp, júz tolǵanǵany jón. Kórshi eldegi kikiljińge qoiyp ketkendi hosh kórip otyrǵan Máskeýdiń óz ishinde erteńgi kúni belarýs halqyn qoldaǵan mitingiler burt etýi ǵajap emes.
"Habarovskidegi ereýilder soǵan dálel. Reseilikter "Lýkash nash" dep urandatqan Pýtinniń tóńiregine toptaspaidy. "Krym nashtyń" qadiri ketkeli qashan. Bul lozýng reseilikterdiń kóz aldynda óz qundylyǵyn joiǵan. Pýtinniń quldyraǵan reitingi osyny kórsetedi", – deidi saiasattanýshy.
