Batys Qazaqstan oblysynyń ákimi Nariman Tóreǵaliev erekshe qorǵalatyn tulǵalarǵa arnalǵan rezidentsiiada turady. Atalǵan záýlim saraiǵa jyl saiyn 115 million teńge bólinedi. Bul týraly qoǵam belsendisi, quqyq qorǵaýshy jáne jemqorlyqqa qarsy kúresker Baýyrjan Zákiev “Vremia svobody” YouTube arnasyna bergen suhbatynda málimdedi, dep habarlaidy Dalanews.kz.
Baýyrjan Zákievtiń pikirinshe, qomaqty qarjyny tek jeke otbasynyń qajettiligine jumsaý orynsyz.
“Bul óte qymbat. Biraq muny jeke tańdaý dep qarastyrýǵa da bolady. Ákim rezidentsiiada turady. Ol úshin ruqsat suramaǵan, biraq oǵan bul quqyq berilgen. Degenmen biz qoǵam jáne belsendi azamattar retinde suraýǵa quqymyz bar: mundai sheshim kimmen jáne qandai negizde jasaldy? Sonymen qatar ákim rezidentsiiada jalǵyz ba, álde otbasy múshelerimen tura ma?”, — dep málimdedi ol.
“Vremia svobody”jýrnalisi de ákimdik rezidentsiiasyna qatysty pikir bildirdi.
“Rezidentsiianyń aýmaǵy 11 myń sharshy metrdi quraidy. Derbes, qorǵalatyn jáne tolyq avtonomdy infraqurylymy bar. Iaǵni bul óte úlken obekt. Onda ańshylyq sharýashylyǵy 94 myń gektarǵa jetedi, saýna, bassein, pirs bar, iahtaǵa arnalǵan oryndar da qarastyrylǵan. Oilap qarasańyz, bul shyn máninde úlken rezidentsiia. Qarjy shyǵyny da jyl saiyn ósip keledi: 2023 jyly 80 mln teńge bolsa, biyl 115 mln teńgege jetken”, — deidi jýrnalist.
Zakiev bul qarajatty áleýmettik maqsattarǵa baǵyttaý áldeqaida tiimdi bolar edi dep esepteidi.
“115 million teńgeni balalar lagerine jáne oiyn-saýyq alańdaryna, sporttyq infraqurylymdy damytýǵa jumsaýǵa bolar edi. Sebebi rezidentsiia park aimaǵynda, ózen jaǵasynda ornalasqan, balalar úshin óte yńǵaily”, – deidi ol.
Qoǵam belsendisi rezidentsiiany ózen jaǵynan da, kósheden de kórgenin aitty. Ol bul máselege tek qoǵam belsendileri emes, oblystyq máslihat depýtattary jáne basqa da ýákiletti organdar, sonyń ishinde memlekettik etika inspektory men memlekettik qyzmet agenttiginiń qaraýy qajet ekenin atap ótti.
“Negizi, bul memlekettik laýazymdy tulǵa bolsa da, oǵan qarajat óte kóp jumsalady. Mysaly, 115 million teńge kólemindegi jyldyq shyǵyndy qarapaiym mysalmen salystyrsaq, men ózim jeke sektorda turamyn. Biz jeti jyl boiy qala ákimdiginen aýdanymyzǵa jańa balalar oiyn alańyn salýdy talap etip kelemiz, biraq nátije joq. Munda 100-ge jýyq bala bar. Olar jazda da, qysta da asfaltta oinaidy. Al 2021 jyly jobalyq-smetalyq qujattar daiyndaldy. Alańnyń baǵasy – 35 million teńge. Biraq biz jeti jyldan beri nátije kóre almai otyrmyz”, – dedi Zakiev.
Jýrnalist 2022 jyly Prezident rezidentsiialardy áleýmettik maqsatta, balalar men jastarǵa arnalǵan nysandarǵa berý jóninde tapsyrma bergenin atap ótti. Alaida Batys Qazaqstan oblysynda bul rezidentsiia áli ákimdiktiń qaraýynda tur.
Buǵan deiin
Aita keteiik, buǵan deiin Oral qalasynyń turǵyny ári muǵalim Ainur Sabyr BQO ákimi Nariman Tóreǵaliulynyń áreketine shaǵymdanyp, Prezidentke, Úkimetke jáne Parlament depýtattaryna ashyq úndeý joldaǵan edi. Onyń aitýynsha, byltyrǵy sý tasqynynan keiin berilgen jańa úidi oblys basshylyǵy “zańsyz berilgen” dep sot arqyly tartyp almaq.
"2024 jyly Oral qalasyn sý basqan kezde asa iri kólemde zardap shektim. Oral qalasy aýmaǵynda ornalasqan, ishine gaz, jaryq, sý tartylǵan úlken qysqy úiim sýǵa ketip, bir ai boiy sý astynda turdy.
QR Prezidenti Q.K. Toqaevtyń “Sý tasqynynan zardap shekkender úisiz qalmasyn” degen tapsyrmasyna orai, Oral qalasy ákimdigi 2024 jyly jaramsyz úidiń ornyna úi berip, shyǵyndarymyzdy ótegen bolatyn”, - dedi ol.
Onyń aitýynsha, barlyq tekserýden ótken qujattar komissiia tarapynan rastalyp, mamandar úidi “turýǵa jaramsyz” dep tanyǵan. Osylaisha arnaiy komissiialar “úi berilsin” degen sheshim shyǵarǵan.
“Alaida bir jyldan keiin Batys Qazaqstan oblysynyń ákimi Nariman Tóreǵaliuly turǵyndardy sotqa berip, Oral qalasy ákimdigi bergen úidi zańsyz dep tanýdy surap otyr”, - dep qosty ol.
Sózinshe, tótenshe jaǵdaidan zardap shekkenderge Prezidenttiń tapsyrmasymen elimizdiń kásipkerleri kómektesken.
“Maǵan da qala ákimdigine sýǵa ketýden zardap shekken turǵyndarǵa demeýshilikpen “Alageum” zaýyty alyp bergen úilerdiń biri berildi. Úidiń kiltin zaýyt direktory Dúren myrza ulym ekeýimizge óz qolymen tabystaǵan bolatyn”, — dedi ol.
Ainur Sabyrdyń sózinshe, BQO ákimi Nariman Tóreǵaliev bul úilerdi “zańsyz berilgen” dep tanytpaq.
“Endi zardaptyń qara bulty seiilip, bastan ótken aýyr jaǵdaidy umyta bastasaq, oblys ákimi óz turǵyndaryna ozbyrlyq kórsetip, tisin batyryp otyr”, - deidi ol.
