Batyrhannyń anasy: "Men ony júrekten ketti dep eseptemeimin"
Bul týraly 31 arnanyń “Uiat emes” baǵdarlamasynda aityldy dep jazady Stan.kz.
– Qaitys bolarynan tórt saǵat buryn ol kisi sizge qońyraý shalypty. Sol kezde Batyr aǵa ne dedi?
– “Ana, sen “Odin v odinge” túsip jatqan kezde habarlaspaǵyn. Búgin saǵat 10:30-da ózim qońyraý shalamyn. Óitkeni úsh saǵat boiy jańaǵy jerde jatýym kerek” dedi. Maquldasyp, kelisip, aitqan tórt saǵaty ótti. Qaita-qaita telefonǵa úńilip qarai bergen edim, kelinim habarlaspaýymdy surady. Tún bolyp ketkenin atty. Ana júregi sezedi ǵoi. Bireýlerdiń jaman habar aitýǵa kele jatqany kózime kórine berdi.
Muny kelinime aitqan edim. Ol “Túú, siz de qaidaǵy jamandy aitasyz. Jatyp uiyqtańyzshy” dedi. Arada 20 minýt ótkeni sol edi, týystarymyz qaraly habardy estirtýge keldi. Men “Onyń ólýi múmkin emes. Jańa ǵana sóilestim. Sender qaidaǵy joqty aitasyńdar” dedim. Sodan keiingisi esimde joq. Úsh saǵat talyp jatyp qalǵan ekenmin. Talyp jatqanymda ministrlik qaita-qaita habarlasyp, “Máiitin qai jaqqa aparamyz? Sol máseleni tezirek sheshińizder” dep suraǵan eken. Týystarymyz Qyzylordaǵa alyp kelýlerin ótinipti. Olar kónbei, báribir de anasynan suraýdy talap etken eken. Júrgenovte isteitin qudama “Aman, sen qaida deseń, sol jerge jerleiik” dedim.
– Siz Batyrdyń júregi aýyratynyn bildińiz be?
– Onyń eshqandai júregi aýyrǵan joq. Keshe Ulttyq kardiologiialyq tsentrde boldym. Meniń aldymnan 15 kún buryn kelip tekserilip ketken eken. Artynsha men baryp júregime ota jasattym. Sol ýaqytta Batyrhan “Meniń anam osy aýrýhanaǵa ota jasatýǵa keledi. Sender meniń osy jerde jatqanymdy aitpańdar” degen eken. Ómiri júregim aýyrady dep shaǵymdanǵan emes.
Dáriger Marhabat Baibosynova “Batyr, seniń aýrýyń júregińde emes, keýdeńde. Qatty qinalyp saksafon tartqan kezde qalqansha beziń jabylyp qalýy múmkin. Sen jatyp emdel” dep aitqan eken. Ulym óz kezeginde mamyr aiynda kelip emdeletinin aitqan. Qudaidyń isi shyǵar. Men ony júrekten ketti dep eseptemeimin. Osy jaqqa kelgen soń ekspertiza jasataiyq degen edik. Týystarymyz qujattardyń barlyǵynda júrek aýrýynan qaitys bolǵany týraly jazylyp qoiǵanyn aityp qarsy shyqty. Men adamnyń qolynan boldy dep oilaimyn.
– Ulyńyz adam qolynan qaza tapty dep oilaisyz. Biraq buǵan dálelińiz bar ma? Al osylai oilaýyńyzǵa ne sebep boldy?
– Meniń eshbir dálelim joq. Ulyma sýǵa birnárse qosyp berdi me dep oilaimyn. Ózimshe grim jasap júrgender shyǵar dep oilaimyn. Balalarym “Ol óziniń ketetinin bilip júrgen” deidi. Dushpandary bolǵan siiaqty. Barlyq nárseni tapsyrdy. Esil-derti balasy bolǵan. Balasyn óte qatty jaqsy kóretin edi.
– Batyr túsińizge kire me?
– Iá, Batyr túsime kiredi. Jańaǵy emhanadan shyǵatyn kúni túsime kirdi. Ózi appaq kiinip alǵan, bilep esikten kirdi. “Ana, sen senimdi adamdardyń qolynda jatyrsyń. Sen jaqsy bolasyń. Myna qyzdardyń bári júgirip júr ǵoi” dep aitty da shyǵyp ketti. Túsim týraly qyzdarǵa aityp bergen edim, “Apa, ol kisi bizdi sondai jaqsy kóretin edi” dep kúldi.
– Yńǵaiyssyz suraq shyǵar. Analar myqty bolady ǵoi. Batyrdan aiyrylǵan soń, qalai óz ózińizge keldińiz?
– Batyrhannyń óliminen keiin adam bolmai qaldym. Júdedim, jyladym. Eshqaida bara almai, eshqaida kele almai júrdim. Esiktiń aldyna shyqsam, kóz aldyma Batyr keledi. Onyń ústine teledidardan qaita-qaita kórsetedi. Sóitip jylaýmen kele jatyrmyz. Halyq sonshalyqty qurmettep jatyr. Olarǵa sondai rizamyn. Olardyń aldynda jylai berýge de uialady ekensiń. Qai bir kúni Meladze kelip, bizdi Batyrdyń basyna ertip bardy. Aidaladaǵy bireýler jylap turyp, bizdi qushaqtap jatyr. Gúl qoiyp, basyn qushaqtap jylap jatyr. Sonyń jaqsylyǵy shyǵar dep oilaimyn.
