بۇل تۋرالى 31 ارنانىڭ “ۇيات ەمەس” باعدارلاماسىندا ايتىلدى دەپ جازادى Stan.kz.
– قايتىس بولارىنان ءتورت ساعات بۇرىن ول كىسى سىزگە قوڭىراۋ شالىپتى. سول كەزدە باتىر اعا نە دەدى؟
– “انا، سەن “ودين ۆ ودينگە” ءتۇسىپ جاتقان كەزدە حابارلاسپاعىن. بۇگىن ساعات 10:30-دا ءوزىم قوڭىراۋ شالامىن. ويتكەنى ءۇش ساعات بويى جاڭاعى جەردە جاتۋىم كەرەك” دەدى. ماقۇلداسىپ، كەلىسىپ، ايتقان ءتورت ساعاتى ءوتتى. قايتا-قايتا تەلەفونعا ءۇڭىلىپ قاراي بەرگەن ەدىم، كەلىنىم حابارلاسپاۋىمدى سۇرادى. ءتۇن بولىپ كەتكەنىن اتتى. انا جۇرەگى سەزەدى عوي. بىرەۋلەردىڭ جامان حابار ايتۋعا كەلە جاتقانى كوزىمە كورىنە بەردى.
مۇنى كەلىنىمە ايتقان ەدىم. ول “ءتۇۇ، ءسىز دە قايداعى جاماندى ايتاسىز. جاتىپ ۇيىقتاڭىزشى” دەدى. ارادا 20 مينۋت وتكەنى سول ەدى، تۋىستارىمىز قارالى حاباردى ەستىرتۋگە كەلدى. مەن “ونىڭ ءولۋى مۇمكىن ەمەس. جاڭا عانا سويلەستىم. سەندەر قايداعى جوقتى ايتاسىڭدار” دەدىم. سودان كەيىنگىسى ەسىمدە جوق. ءۇش ساعات تالىپ جاتىپ قالعان ەكەنمىن. تالىپ جاتقانىمدا مينيسترلىك قايتا-قايتا حابارلاسىپ، “ءمايىتىن قاي جاققا اپارامىز؟ سول ماسەلەنى تەزىرەك شەشىڭىزدەر” دەپ سۇراعان ەكەن. تۋىستارىمىز قىزىلورداعا الىپ كەلۋلەرىن ءوتىنىپتى. ولار كونبەي، ءبارىبىر دە اناسىنان سۇراۋدى تالاپ ەتكەن ەكەن. جۇرگەنوۆتە ىستەيتىن قۇداما “امان، سەن قايدا دەسەڭ، سول جەرگە جەرلەيىك” دەدىم.
– ءسىز باتىردىڭ جۇرەگى اۋىراتىنىن ءبىلدىڭىز بە؟
– ونىڭ ەشقانداي جۇرەگى اۋىرعان جوق. كەشە ۇلتتىق كارديولوگيالىق سەنتردە بولدىم. مەنىڭ الدىمنان 15 كۇن بۇرىن كەلىپ تەكسەرىلىپ كەتكەن ەكەن. ارتىنشا مەن بارىپ جۇرەگىمە وتا جاساتتىم. سول ۋاقىتتا باتىرحان “مەنىڭ انام وسى اۋرۋحاناعا وتا جاساتۋعا كەلەدى. سەندەر مەنىڭ وسى جەردە جاتقانىمدى ايتپاڭدار” دەگەن ەكەن. ءومىرى جۇرەگىم اۋىرادى دەپ شاعىمدانعان ەمەس.
دارىگەر مارحابات بايبوسىنوۆا “باتىر، سەنىڭ اۋرۋىڭ جۇرەگىڭدە ەمەس، كەۋدەڭدە. قاتتى قينالىپ ساكسافون تارتقان كەزدە قالقانشا بەزىڭ جابىلىپ قالۋى مۇمكىن. سەن جاتىپ ەمدەل” دەپ ايتقان ەكەن. ۇلىم ءوز كەزەگىندە مامىر ايىندا كەلىپ ەمدەلەتىنىن ايتقان. قۇدايدىڭ ءىسى شىعار. مەن ونى جۇرەكتەن كەتتى دەپ ەسەپتەمەيمىن. وسى جاققا كەلگەن سوڭ ەكسپەرتيزا جاساتايىق دەگەن ەدىك. تۋىستارىمىز قۇجاتتاردىڭ بارلىعىندا جۇرەك اۋرۋىنان قايتىس بولعانى تۋرالى جازىلىپ قويعانىن ايتىپ قارسى شىقتى. مەن ادامنىڭ قولىنان بولدى دەپ ويلايمىن.
– ۇلىڭىز ادام قولىنان قازا تاپتى دەپ ويلايسىز. ءبىراق بۇعان دالەلىڭىز بار ما؟ ال وسىلاي ويلاۋىڭىزعا نە سەبەپ بولدى؟
– مەنىڭ ەشبىر دالەلىم جوق. ۇلىما سۋعا بىرنارسە قوسىپ بەردى مە دەپ ويلايمىن. وزىمشە گريم جاساپ جۇرگەندەر شىعار دەپ ويلايمىن. بالالارىم “ول ءوزىنىڭ كەتەتىنىن ءبىلىپ جۇرگەن” دەيدى. دۇشپاندارى بولعان سياقتى. بارلىق نارسەنى تاپسىردى. ەسىل-دەرتى بالاسى بولعان. بالاسىن وتە قاتتى جاقسى كورەتىن ەدى.
– باتىر تۇسىڭىزگە كىرە مە؟
– ءيا، باتىر تۇسىمە كىرەدى. جاڭاعى ەمحانادان شىعاتىن كۇنى تۇسىمە كىردى. ءوزى اپپاق كيىنىپ العان، بيلەپ ەسىكتەن كىردى. “انا، سەن سەنىمدى ادامداردىڭ قولىندا جاتىرسىڭ. سەن جاقسى بولاسىڭ. مىنا قىزداردىڭ ءبارى جۇگىرىپ ءجۇر عوي” دەپ ايتتى دا شىعىپ كەتتى. ءتۇسىم تۋرالى قىزدارعا ايتىپ بەرگەن ەدىم، “اپا، ول كىسى ءبىزدى سونداي جاقسى كورەتىن ەدى” دەپ كۇلدى.
– ىڭعايىسسىز سۇراق شىعار. انالار مىقتى بولادى عوي. باتىردان ايىرىلعان سوڭ، قالاي ءوز وزىڭىزگە كەلدىڭىز؟
– باتىرحاننىڭ ولىمىنەن كەيىن ادام بولماي قالدىم. جۇدەدىم، جىلادىم. ەشقايدا بارا الماي، ەشقايدا كەلە الماي ءجۇردىم. ەسىكتىڭ الدىنا شىقسام، كوز الدىما باتىر كەلەدى. ونىڭ ۇستىنە تەلەديداردان قايتا-قايتا كورسەتەدى. ءسويتىپ جىلاۋمەن كەلە جاتىرمىز. حالىق سونشالىقتى قۇرمەتتەپ جاتىر. ولارعا سونداي ريزامىن. ولاردىڭ الدىندا جىلاي بەرۋگە دە ۇيالادى ەكەنسىڭ. قاي ءبىر كۇنى مەلادزە كەلىپ، ءبىزدى باتىردىڭ باسىنا ەرتىپ باردى. ايدالاداعى بىرەۋلەر جىلاپ تۇرىپ، ءبىزدى قۇشاقتاپ جاتىر. گۇل قويىپ، باسىن قۇشاقتاپ جىلاپ جاتىر. سونىڭ جاقسىلىعى شىعار دەپ ويلايمىن.
