Keleli kezdesýde munaishylar «Qazmunaigaz» ulttyq kompaniiasynyń basshylyǵymen jolyǵyp, túitkildi máselelerdiń túiinin tarqatty.
«Qazmunaigaz» bastamasymen kásibi biliktilikti arttyrý treningi retinde ótken ekikúndik jiynda kásipodaq uiymdarynyń belsendileri QMG basshylyǵyna «Ózenmunaigaz» kompaniiasyndaǵy ózekti máseleler jaily baiandap, ony sheshý joldary men jergilikti turǵyndardyń áleýmettik jaǵdaiyn jaqsartý boiynsha usynystaryn ortaǵa saldy.
Áńgime barysynda óndirispen qatar, jumysshylardyń kásibi biliktiligin, eńbek pen tártip ónimdiligin arttyrý sekildi taqyryptar da qozǵaldy.
«Bizdiń basty bailyǵymyz munai emes – adamdarymyz. Jumysshylardyń áleýmettik jaǵdaiyn jaqsartý, kásibi biliktiligin arttyrý, bilimin tereńdetý, basyn biriktirip, aýyzbirshiligin nyǵaitý – kompaniianyń basty mindetteriniń biri.
Biz betpe-bet júzdesip, ózekti máselelerdi ashyq talqylap, senimdi dialog ornata bildik. Mundai erkin, beiresmi kezdesýlerdi turaqty túrde ótkizetin bolamyz», - dep atap ótti QMG Basqarma tóraǵasy Maǵzum Myrzaǵaliev.
Bul týraly kezdesýden keiin «Ózenmunaigaz» jumysshylarynyń jergilikti kásipodaǵy» qoǵamdyq birlestiginiń №1 munai-gaz óndirý basqarmasynyń kásipodaq ókili Álibek Sársenov baiandap berdi.
«Dál osyndai beiresmi joldastyq kezdesýler adamdardy shynymen jaqyndastyrady. Búgingi jiynnyń nátijesinde «QazMunaiGaz» basshylyǵy men Jańaózen qalasynyń kásipodaq ókilderi túitkildi máselelerde ortaq kelisimge kelip, ózara senimdi qarym-qatynas ornatty. Al treningke keler bolsaq, eńbek janjaldaryn tiimdi sheshýdiń jańa daǵdylaryn igerý turǵysynan qundy aqparat aldyq», - dedi jańaózendik maman.
Joba boiynsha Jańaózen qalasynyń daryndy balalary elimizdiń úzdik arnaýly orta bilim berý mekemelerinde tegin bilim alý múmkindigine ie boldy.
Eki kúndik kezdesýge ÓMG bas direktory Maqsat Ibaǵarov, ÓMG qurylym basshylary, kásipodaq tóraǵasy men ÓMG kásipodaq uiymdarynyń (10 myń múshe) kóshbasshylary, sondai-aq «QazGÓZ» JShS kásipodaq tóraǵasy qatysty.
