"Kazaqmys" korporatsiiasy Jomart kenishinde jeti kenshiniń ómirin jalmaǵan apatqa bailanysty pikir bildirdi. Aitýlarynsha, bastapqy boljam shyndyqqa janaspaidy, dep habarlaidy Dalanews.kz.
Kompaniia bastapqyda qaiǵyly oqiǵanyń sebebi retinde qarastyrylǵan ken qazbalarynyń opyrylýyn joqqa shyǵardy.
"Bastapqy nusqa – jer qabatynyń opyrylýy bolǵan. Alaida apattyq-qutqarý brigadalarynyń oqiǵa ornyna túsýi barysynda qulaý faktisi rastalmady. Kenish jumysy tergeý aiaqtalǵanǵa deiin ýaqytsha toqtatyldy. Qazirgi tańda tabiǵi gazdyń jarylysyna ne sebep bolǵany jan-jaqty taldanýda. Kompaniia Úkimettik komissiia jáne tergeý organdarymen tyǵyz bailanysta jumys istep, qoldanystaǵy qaýipsizdik standarttaryna ózgerister engizýdi josparlap otyr. Sońǵy úsh jylda "Qazaqmys" eńbek qaýipsizdigine 87 milliard teńgeden astam investitsiia quisa, 2025 jylǵa 38 milliard teńge kóleminde qarjylandyrý kózdelgen. Kompaniia jumyskerlerdiń qaýipsizdigin qamtamasyz etýdi basty basymdyq retinde qarastyrady", – dep habarlady korporatsiia ókilderi.
Aita keteiik, buǵan deiin "Qazaqmys" kompaniiasy "Jomart" kenishindegi qaiǵyly oqiǵaǵa bailanysty qaza tapqan jumyskerlerdiń otbasyn qoldaý úshin naqty qandai shara qabyldanǵanyn aitqan edi. Is barysynda ishki shtab qurylyp, ótemaqy tóleý, máiitterdi tasymaldaý, nesie boiynsha mindettemelerdi oryndaý jáne otbasy múshelerin jumyspen qamtý máseleleri nazarǵa alyndy.
Kompaniia basshylyǵy elimizdiń túrli óńirlerine máiitterdi jetkizý shyǵynyn óz moinyna alǵan. Jaqyn týystarynyń ótinishi boiynsha úsh kenshiniń denesi Túrkistan, Qaraǵandy oblystaryna, qalǵandary Jezqazǵan, Sátbaev qalalaryna jetkizildi. Taiaýda otbasy múshelerimen kezdesý uiymdastyrylyp, jumyspen qamtý jáne turǵyn úi jaǵdaiyn jaqsartý máseleleri talqylanady.
Qazaqmys korporatsiiasy óz qyzmetkerlerin eńbek mindetterin oryndaý barysyndaǵy jazataiym oqiǵadan saqtandyrý úshin "KM Life" ómirdi saqtandyrý kompaniiasynda mindetti saqtandyrýmen qatar erikti saqtandyrýmen qamtamasyz etken. Bul sheshim jumyskerler men olardyń otbasyn oqys oqiǵalardyń saldarynan týyndaityn zardaptan qarjylai qorǵaý maqsatynda qabyldanǵan.
"KM Life" saqtandyrý kompaniiasy mindetti jáne erikti saqtandyrý sharttary boiynsha barlyq mindettemelerin tolyq kólemde jáne der kezinde oryndaýǵa kepildik beredi.
"KM Life" saqtandyrý kompaniiasy qaza tapqan ár kenshiniń asyraýynda bala bolǵanyn eskerip, olardyń otbasyna asyraýshysynan aiyrylýyna bailanysty saqtandyrý tólemin taǵaiyndaidy. Saqtandyrý tóleminiń mólsheri qaitqan adamnyń asyraýyndaǵy adamdardyń sanyna jáne onyń ortasha ailyq jalaqysyna bailanysty bolady. Bul tólemder balalar 18 jasqa tolǵanǵa deiin ai saiyn tólenedi, eger olar joǵary oqý ornynyń kúndizgi bóliminde oqysa, 23 jasqa deiin tólenedi. Sondai-aq 14 jasqa deiingi balalarǵa kútim jasaityn, jumys istemeitin analarǵa da tólem taǵaiyndalady.
Qaitys bolǵan asyraýshynyń asyraýyndaǵy adamdarǵa tólenetin saqtandyrý tóleminiń kólemi jyl saiyn boljamdy infliatsiia deńgeiine para-par mólsherde ulǵaiyp otyrady. Budan bólek qaza tapqan kenshilerdiń otbasy "KM Life" saqtandyrý kompaniiasynan 100 AEK mólsherinde jerleý rásimine arnalǵan birjolǵy tólem alýǵa quqyly.
Ujymdyq shartqa sáikes, qaza tapqandardyń otbasyna jerleý rásimin atqarý úshin 550 AEK nemese 2,2 mln teńge mólsherinde birjolǵy tólem aýdaryldy. Aldaǵy ýaqytta olarǵa jyldyq jalaqynyń 10 eselengen mólsheri tólenedi, onyń somasy 84 mln teńgeden 141 mln teńgege deiin jetedi.
Sondai-aq asyraýshysynan aiyrylý jaǵdaiyna ai saiynǵy tólemder, balalardyń oqý aqysyn tóleý, sondai-aq otbasy músheleriniń ótinishi boiynsha basqa da kómek túrleri qarastyrylǵan.
Sonymen qatar qaza tapqan kenshilerdiń bank aldyndaǵy qaryzy nazarǵa alynýda. Qaitys bolǵandar men olardyń jaqyn týystarynyń barlyq boryshyn naqtylaý úshin QR Qarjy naryǵyn retteý jáne damytý agenttigine hat jiberildi. Qazirgi kezde Bank RBK, Kaspi jáne Halyk Bank-te jalpy somasy 47,5 mln teńgeni quraityn nesie men ipoteka anyqtaldy. Qaryzdy óteý boiynsha jumys júrgizilýde.
