Kosmetologiialyq klinikalar jelisiniń basshysy birneshe adamdy ondaǵan million teńgege aldap ketken. Jábirlenýshilerdiń arasynda qalalyq máslihattyń burynǵy depýtaty da bar. Ol kásipker áielge biznesin damytý úshin 80 million teńge bergen. Bul týraly «Diapazon» basylymy jazdy, dep habarlaidy dalanews.kz.
Sottalýshy – 33 jastaǵy Aigerim K. esimdi áiel. Ol investorlarǵa Ońtústik Koreiadan meditsinalyq apparattar satyp alyp, olardy TMD elderine qaita satý jáne klinikalar jelisin keńeitý arqyly tabys tabýdy usynǵan.
Alaida onyń usynysyna sengen adamdar aqshasynan aiyrylǵan.
Jábirlenýshilerdiń biri bastapqyda kásipkerge qolma-qol 10 million teńge bergen. Keiin bankten 24 million teńge nesie rásimdep, ony da áielge tapsyrǵan. Taǵy bir áiel jeke úiin satyp, túsken aqshany onyń biznesine salǵan. Qazir sottalýshy oǵan 14 million teńgeden astam qaryz.
Eń kóp shyǵynǵa ushyraǵandardyń biri – qalalyq máslihattyń burynǵy depýtaty. Ol Aigerimmen jaqsy qarym-qatynasta bolǵan, onyń klinikasynda qyzmet alǵan jáne kásipkerge sengen. Osylaisha áielge jalpy somasy 80 million teńge bergen.
Bastapqyda kásipker qaryzdyń bir bóligin ai saiyn qaitaryp otyrǵan. Alaida keiin tólemder toqtaǵan. Burynǵy depýtattyń aitýynsha, paiyzdardy qosqanda áieldiń oǵan bereshegi 97 million teńgege jetken.
Qylmystyq is boiynsha barlyǵy bes epizod qaralǵan. Alaida sottalýshy óz kinásin moiyndamaǵan. Onyń aitýynsha, ol eshkimge bizneske investitsiia salýdy usynbaǵan, tek qaryzǵa aqsha alǵan. Sondai-aq jábirlenýshilerdiń birinen 59 million teńge alyp, keiin 89 million teńge qaitarǵanyn aitqan. Biraq olardyń arasyndaǵy dostyq qarym-qatynasqa bailanysty aqshanyń qaitarylǵanyn qujat júzinde rásimdemegenin málimdegen.
Al burynǵy depýtattyń politsiiaǵa aryz jazýyn áiel onyń qońyraýlaryna jaýap bermei qoiǵanymen túsindirgen. Sottalýshynyń sózinshe, ol kezde ýaqytsha ustaý izoliatorynda bolǵandyqtan, telefon qońyraýlaryn qabyldai almaǵan.
Sot Aigerim K.-ny barlyq epizod boiynsha alaiaqtyq jasaǵany úshin kináli dep tanyp, 5 jyl 6 aiǵa bas bostandyǵynan aiyrý jazasyn taǵaiyndady.
Alaida ol birden túrmege qamalmaidy. Sot tórt balanyń anasy ekenin, kenje balasy biyl shildede dúniege kelgenin eskerip, jazany óteýdi bes jylǵa keiinge qaldyrǵan. Úkimde sottalǵan áieldiń ajyrasqany da kórsetilgen.
Sonymen qatar sot oǵan jábirlenýshilerge keltirilgen shyǵyndy óteýdi mindettedi. Ázirge úkim zańdy kúshine engen joq.
