Túrkiianyń Malatia provintsiiasynda áskeri tikushaq apatqa ushyrap, tórt áskeri qyzmetshi qaza tapty. Qaiǵyly oqiǵa týraly aqparatty eldiń Qorǵanys ministrligi resmi túrde rastady, dep habarlaidy dalanews.kz.
Áýe apaty 12 qarasha kúni Túrkiianyń Malatia provintsiiasyna qarasty Eshiliýrt aýdanynda bolǵan. Aldyn ala málimet boiynsha, Túrkiia qarýly kúshterine tiesili S-70 úlgisindegi áskeri tikushaq Samankói eldi mekeniniń mańynda belgisiz sebeptermen qulaǵan.
Tikushaq bortynda tórt áskeri qyzmetshi bolǵan. Olardyń barlyǵy apat saldarynan qaza tapty. Túrkiianyń Ulttyq qorǵanys ministrligi qaiǵyly oqiǵany rastap, qaza bolǵan áskeri qyzmetshilerdiń otbasylaryna kóńil aitty.
"S-70 úlgisindegi tikushaǵymyz Malatiada ázirge anyqtalmaǵan sebeppen apatqa ushyrady. Sonyń saldarynan bortta bolǵan tórt áskeri qyzmetshimiz qaza tapty", – delingen ministrlik málimdemesinde.
Oqiǵadan keiin apat ornyna órt sóndirýshiler, jedel járdem qyzmetkerleri men qutqarýshylar jiberildi. Jergilikti buqaralyq aqparat quraldarynyń málimetinshe, tikushaq jerge qulaǵannan keiin órt shyqqan. Mamandar apat ornyna jetip, jalyndy sóndirýge jáne ushaq synyqtaryn tekserýge kirisken.
Áleýmettik jelilerde qaiǵyly oqiǵa ornynan túsirilgen beinejazbalar da tarady. Kadrlardan tikushaqtyń órtengen qaldyqtary men sol jerde jumys istep jatqan tótenshe jaǵdailar qyzmetkerlerin kórýge bolady.
Apattyń naqty sebebi ázirge belgisiz. Túrkiianyń Malatia qalasyndaǵy prokýratýrasy oqiǵaǵa bailanysty tergeý bastady. Tergeý aiasynda tikushaqtyń qandai jaǵdaida qulaǵany jáne áýe apatyna ne sebep bolǵany anyqtalmaq.
