Májilistiń burynǵy depýtaty, zańger Baqytjan Bazarbek «Halyq súiiktisi» ulttyq syilyǵynyń jeńimpazy atandy. Ol "2026 jyldyń úzdik Parlament depýtaty" nominatsiiasynda úzdik dep tanylyp, áleýmettik jelide qýanyshyn bólisti, dep dalanews.kz tilshisi Kznews.kz saityna silteme jasap habarlaidy.
Baqytjan Bazarbek Facebook paraqshasynda jariialaǵan jazbasynda bul marapattyń ózi úshin erekshe mańyzǵa ie ekenin atap ótti. Eks-depýtattyń aitýynsha, halyq tarapynan kórsetilgen qoldaý men senim onyń Parlamentte atqarǵan jumysyna berilgen baǵa ispetti.
"Halyqtyń múddesin birinshi orynǵa qoiatyn men úshin bul marapattyń orny erekshe. Óitkeni bul – halyqtyń maǵan bergen baǵasy, eńbegime kórsetken qurmeti", – dep jazdy ol.
Bazarbek depýtattyq qyzmeti barysynda qoǵamdyq máselelerdi kóterip, azamattardyń múddesin qorǵaýǵa basymdyq bergenin jetkizdi. Ol osy jolda túrli qiyndyqtarǵa tap bolǵanyn da jasyrmady. Soǵan qaramastan, halyq aldyndaǵy jaýapkershilikti basty ustanymdarynyń biri retinde saqtaǵanyn aitty.
"Biliktiń súiiktisi bolmasam da, halqymnyń súiiktisi bolýǵa tyrystym. Sol sara jolda talai synnan ótsem de, halqymnyń múddesi árdaiym júregimnen oryn aldy. Búgingi marapat – sonyń bir dáleli dep bilemin", – dedi eks-depýtat.
Burynǵy depýtattyń sózinshe, ózi úshin marapat pen ataqtan góri Parlamentte atqarǵan jumysynyń naqty nátijesi áldeqaida mańyzdy. Atap aitqanda, ol zańnamany jetildirý, sybailas jemqorlyqqa qarsy kúres jáne qoǵamdaǵy ádilettilik qaǵidattaryn nyǵaitý baǵytyndaǵy eńbeginiń el ómirine qanshalyqty paida ákelgenine mán beretinin jetkizdi.
