"كازاقمىس" كورپوراسياسى جومارت كەنىشىندە جەتى كەنشىنىڭ ءومىرىن جالماعان اپاتقا بايلانىستى پىكىر ءبىلدىردى. ايتۋلارىنشا، باستاپقى بولجام شىندىققا جاناسپايدى، دەپ حابارلايدى Dalanews.kz.
كومپانيا باستاپقىدا قايعىلى وقيعانىڭ سەبەبى رەتىندە قاراستىرىلعان كەن قازبالارىنىڭ وپىرىلۋىن جوققا شىعاردى.
"باستاپقى نۇسقا – جەر قاباتىنىڭ وپىرىلۋى بولعان. الايدا اپاتتىق-قۇتقارۋ بريگادالارىنىڭ وقيعا ورنىنا ءتۇسۋى بارىسىندا قۇلاۋ فاكتىسى راستالمادى. كەنىش جۇمىسى تەرگەۋ اياقتالعانعا دەيىن ۋاقىتشا توقتاتىلدى. قازىرگى تاڭدا تابيعي گازدىڭ جارىلىسىنا نە سەبەپ بولعانى جان-جاقتى تالدانۋدا. كومپانيا ۇكىمەتتىك كوميسسيا جانە تەرگەۋ ورگاندارىمەن تىعىز بايلانىستا جۇمىس ىستەپ، قولدانىستاعى قاۋىپسىزدىك ستاندارتتارىنا وزگەرىستەر ەنگىزۋدى جوسپارلاپ وتىر. سوڭعى ءۇش جىلدا "قازاقمىس" ەڭبەك قاۋىپسىزدىگىنە 87 ميلليارد تەڭگەدەن استام ينۆەستيسيا قۇيسا، 2025 جىلعا 38 ميلليارد تەڭگە كولەمىندە قارجىلاندىرۋ كوزدەلگەن. كومپانيا جۇمىسكەرلەردىڭ قاۋىپسىزدىگىن قامتاماسىز ەتۋدى باستى باسىمدىق رەتىندە قاراستىرادى"، – دەپ حابارلادى كورپوراسيا وكىلدەرى.
ايتا كەتەيىك، بۇعان دەيىن "قازاقمىس" كومپانياسى "جومارت" كەنىشىندەگى قايعىلى وقيعاعا بايلانىستى قازا تاپقان جۇمىسكەرلەردىڭ وتباسىن قولداۋ ءۇشىن ناقتى قانداي شارا قابىلدانعانىن ايتقان ەدى. ءىس بارىسىندا ىشكى شتاب قۇرىلىپ، وتەماقى تولەۋ، مايىتتەردى تاسىمالداۋ، نەسيە بويىنشا مىندەتتەمەلەردى ورىنداۋ جانە وتباسى مۇشەلەرىن جۇمىسپەن قامتۋ ماسەلەلەرى نازارعا الىندى.
كومپانيا باسشىلىعى ەلىمىزدىڭ ءتۇرلى وڭىرلەرىنە مايىتتەردى جەتكىزۋ شىعىنىن ءوز موينىنا العان. جاقىن تۋىستارىنىڭ ءوتىنىشى بويىنشا ءۇش كەنشىنىڭ دەنەسى تۇركىستان، قاراعاندى وبلىستارىنا، قالعاندارى جەزقازعان، ساتبايەۆ قالالارىنا جەتكىزىلدى. تاياۋدا وتباسى مۇشەلەرىمەن كەزدەسۋ ۇيىمداستىرىلىپ، جۇمىسپەن قامتۋ جانە تۇرعىن ءۇي جاعدايىن جاقسارتۋ ماسەلەلەرى تالقىلانادى.
قازاقمىس كورپوراسياسى ءوز قىزمەتكەرلەرىن ەڭبەك مىندەتتەرىن ورىنداۋ بارىسىنداعى جازاتايىم وقيعادان ساقتاندىرۋ ءۇشىن "KM Life" ءومىردى ساقتاندىرۋ كومپانياسىندا مىندەتتى ساقتاندىرۋمەن قاتار ەرىكتى ساقتاندىرۋمەن قامتاماسىز ەتكەن. بۇل شەشىم جۇمىسكەرلەر مەن ولاردىڭ وتباسىن وقىس وقيعالاردىڭ سالدارىنان تۋىندايتىن زارداپتان قارجىلاي قورعاۋ ماقساتىندا قابىلدانعان.
"KM Life" ساقتاندىرۋ كومپانياسى مىندەتتى جانە ەرىكتى ساقتاندىرۋ شارتتارى بويىنشا بارلىق مىندەتتەمەلەرىن تولىق كولەمدە جانە دەر كەزىندە ورىنداۋعا كەپىلدىك بەرەدى.
"KM Life" ساقتاندىرۋ كومپانياسى قازا تاپقان ءار كەنشىنىڭ اسىراۋىندا بالا بولعانىن ەسكەرىپ، ولاردىڭ وتباسىنا اسىراۋشىسىنان ايىرىلۋىنا بايلانىستى ساقتاندىرۋ تولەمىن تاعايىندايدى. ساقتاندىرۋ تولەمىنىڭ مولشەرى قايتقان ادامنىڭ اسىراۋىنداعى ادامداردىڭ سانىنا جانە ونىڭ ورتاشا ايلىق جالاقىسىنا بايلانىستى بولادى. بۇل تولەمدەر بالالار 18 جاسقا تولعانعا دەيىن اي سايىن تولەنەدى، ەگەر ولار جوعارى وقۋ ورنىنىڭ كۇندىزگى بولىمىندە وقىسا، 23 جاسقا دەيىن تولەنەدى. سونداي-اق 14 جاسقا دەيىنگى بالالارعا كۇتىم جاسايتىن، جۇمىس ىستەمەيتىن انالارعا دا تولەم تاعايىندالادى.
قايتىس بولعان اسىراۋشىنىڭ اسىراۋىنداعى ادامدارعا تولەنەتىن ساقتاندىرۋ تولەمىنىڭ كولەمى جىل سايىن بولجامدى ينفلياسيا دەڭگەيىنە پارا-پار مولشەردە ۇلعايىپ وتىرادى. بۇدان بولەك قازا تاپقان كەنشىلەردىڭ وتباسى "KM Life" ساقتاندىرۋ كومپانياسىنان 100 اەك مولشەرىندە جەرلەۋ راسىمىنە ارنالعان ءبىرجولعى تولەم الۋعا قۇقىلى.
ۇجىمدىق شارتقا سايكەس، قازا تاپقانداردىڭ وتباسىنا جەرلەۋ ءراسىمىن اتقارۋ ءۇشىن 550 اەك نەمەسە 2،2 ملن تەڭگە مولشەرىندە ءبىرجولعى تولەم اۋدارىلدى. الداعى ۋاقىتتا ولارعا جىلدىق جالاقىنىڭ 10 ەسەلەنگەن مولشەرى تولەنەدى، ونىڭ سوماسى 84 ملن تەڭگەدەن 141 ملن تەڭگەگە دەيىن جەتەدى.
سونداي-اق اسىراۋشىسىنان ايىرىلۋ جاعدايىنا اي سايىنعى تولەمدەر، بالالاردىڭ وقۋ اقىسىن تولەۋ، سونداي-اق وتباسى مۇشەلەرىنىڭ ءوتىنىشى بويىنشا باسقا دا كومەك تۇرلەرى قاراستىرىلعان.
سونىمەن قاتار قازا تاپقان كەنشىلەردىڭ بانك الدىنداعى قارىزى نازارعا الىنۋدا. قايتىس بولعاندار مەن ولاردىڭ جاقىن تۋىستارىنىڭ بارلىق بورىشىن ناقتىلاۋ ءۇشىن ق ر قارجى نارىعىن رەتتەۋ جانە دامىتۋ اگەنتتىگىنە حات جىبەرىلدى. قازىرگى كەزدە Bank RBK، Kaspi جانە Halyk Bank-تە جالپى سوماسى 47،5 ملن تەڭگەنى قۇرايتىن نەسيە مەن يپوتەكا انىقتالدى. قارىزدى وتەۋ بويىنشا جۇمىس جۇرگىزىلۋدە.
