Almaty qalalyq óńirlik kommýnikatsiialar qyzmetinde ótken brifingte Túrksib aýdanynyń ákimi Baqytjan Aqjarov 6-kvartal turǵyndarynyń shaǵymyna qatysty pikir bildirdi. Turǵyndar prezidentke júginip, úileriniń súriletini týraly aldyn ala eskertilmegenin jáne injenerlik jelilerdiń óshirilgenin aitqan, dep habarlaidy Dalanews.kz Informburo agenttigine silteme jasap.
Tolstoi – Moldaǵaliev – Aqan Seri – Spartak kóshelerimen shektelgen aýmaq turǵyndary bolyp jatqan jaǵdaidy “rekonstrýktsiia degen jeleýmen jasalǵan zańsyzdyq” dep atady. Olardyń aitýynsha, úiler sot sheshiminsiz súrile bastaǵan, kommýnikatsiialar toqtatylǵan, al úiler elektrondy kartadan múlde joǵalyp ketken. Keibir turǵyndar qonys aýdarýǵa kelisim bermegenin málimdegen.
Aýdan ákiminiń aitýynsha, bul aýmaqtaǵy 100-den astam páterdiń 90-nan astamy kóshirilgen. Qazirgi tańda 6-9 menshik iesi ǵana qaldy, onymen kelissózder jalǵasýda. Jobany Kapitaldyq qurylys kásiporny (KQK) qurylys kompaniiasy men investor birlesip júzege asyrýda.
“Turǵyndardyń kelisimi – basty shart. Kópshiligi jańa úilerge kóship ketti. Al qalǵandarymen jeke sóilesip jatyrmyz. Olardyń óz talaptary bar: biri kóbirek bólme suraidy, biri – birinshi ne ekinshi qabattan bolsyn deidi. Alaida munyń bárin birdei oryndaý múmkin emes”, – dedi Aqjarov.
Ol jańa páterlerdiń kóbine azdap keńirek bolatynyn jáne tolyq árlenip beriletinin aitty. Alaida daý týdyratyn jaǵdailar da bar. Máselen, keibir turǵyndar jańa úidiń jalpy aýmaǵy úlken bolǵanymen, turǵyn bólmesi tarlaý ekenin aityp narazy. Basqalary lifti joq úidiń altynshy qabatyna kóshkisi kelmeidi.
“Ár jaǵdaidy jeke qarastyramyz. Kelińizder – KQK ókilderin shaqyryp, bárin egjei-tegjeili talqylaimyz. Eshkimdi májbúrlemeimiz, kelispeseńiz – qol qoimaýǵa tolyq quqyǵyńyz bar”, – dep sendirdi ákim.
Kommýnikatsiialardyń óshirilýi jónindegi suraqqa Aqjarov kommýnaldyq qyzmetterden resmi habar túspegenin, alaida apattyq jaǵdaiǵa bailanysty ýaqytsha úzilýi múmkin ekenin aitty.
Turǵyndar úileriniń ainalasy qorshaýmen qorshalǵanyn da synǵa alǵan. Ákim bul aqparatty rastady: qorshaý tek turǵyndar kóship ketken ýchaskelerde ǵana ornatylǵan.
