الماتى قالالىق وڭىرلىك كوممۋنيكاسيالار قىزمەتىندە وتكەن بريفينگتە تۇركسىب اۋدانىنىڭ اكىمى باقىتجان اقجاروۆ 6-كۆارتال تۇرعىندارىنىڭ شاعىمىنا قاتىستى پىكىر ءبىلدىردى. تۇرعىندار پرەزيدەنتكە جۇگىنىپ، ۇيلەرىنىڭ سۇرىلەتىنى تۋرالى الدىن الا ەسكەرتىلمەگەنىن جانە ينجەنەرلىك جەلىلەردىڭ وشىرىلگەنىن ايتقان، دەپ حابارلايدى Dalanews.kz Informburo اگەنتتىگىنە سىلتەمە جاساپ.
تولستوي – مولداعالييەۆ – اقان سەرى – سپارتاك كوشەلەرىمەن شەكتەلگەن اۋماق تۇرعىندارى بولىپ جاتقان جاعدايدى “رەكونسترۋكسيا دەگەن جەلەۋمەن جاسالعان زاڭسىزدىق” دەپ اتادى. ولاردىڭ ايتۋىنشا، ۇيلەر سوت شەشىمىنسىز سۇرىلە باستاعان، كوممۋنيكاسيالار توقتاتىلعان، ال ۇيلەر ەلەكتروندى كارتادان مۇلدە جوعالىپ كەتكەن. كەيبىر تۇرعىندار قونىس اۋدارۋعا كەلىسىم بەرمەگەنىن مالىمدەگەن.
اۋدان اكىمىنىڭ ايتۋىنشا، بۇل اۋماقتاعى 100-دەن استام پاتەردىڭ 90-نان استامى كوشىرىلگەن. قازىرگى تاڭدا 6-9 مەنشىك يەسى عانا قالدى، ونىمەن كەلىسسوزدەر جالعاسۋدا. جوبانى كاپيتالدىق قۇرىلىس كاسىپورنى (كقك) قۇرىلىس كومپانياسى مەن ينۆەستور بىرلەسىپ جۇزەگە اسىرۋدا.
“تۇرعىنداردىڭ كەلىسىمى – باستى شارت. كوپشىلىگى جاڭا ۇيلەرگە كوشىپ كەتتى. ال قالعاندارىمەن جەكە سويلەسىپ جاتىرمىز. ولاردىڭ ءوز تالاپتارى بار: ءبىرى كوبىرەك بولمە سۇرايدى، ءبىرى – ءبىرىنشى نە ەكىنشى قاباتتان بولسىن دەيدى. الايدا مۇنىڭ ءبارىن بىردەي ورىنداۋ مۇمكىن ەمەس”، – دەدى اقجاروۆ.
ول جاڭا پاتەرلەردىڭ كوبىنە ازداپ كەڭىرەك بولاتىنىن جانە تولىق ارلەنىپ بەرىلەتىنىن ايتتى. الايدا داۋ تۋدىراتىن جاعدايلار دا بار. ماسەلەن، كەيبىر تۇرعىندار جاڭا ءۇيدىڭ جالپى اۋماعى ۇلكەن بولعانىمەن، تۇرعىن بولمەسى تارلاۋ ەكەنىن ايتىپ نارازى. باسقالارى ءليفتى جوق ءۇيدىڭ التىنشى قاباتىنا كوشكىسى كەلمەيدى.
“ءار جاعدايدى جەكە قاراستىرامىز. كەلىڭىزدەر – كقك وكىلدەرىن شاقىرىپ، ءبارىن ەگجەي-تەگجەيلى تالقىلايمىز. ەشكىمدى ماجبۇرلەمەيمىز، كەلىسپەسەڭىز – قول قويماۋعا تولىق قۇقىعىڭىز بار”، – دەپ سەندىردى اكىم.
كوممۋنيكاسيالاردىڭ ءوشىرىلۋى جونىندەگى سۇراققا اقجاروۆ كوممۋنالدىق قىزمەتتەردەن رەسمي حابار تۇسپەگەنىن، الايدا اپاتتىق جاعدايعا بايلانىستى ۋاقىتشا ءۇزىلۋى مۇمكىن ەكەنىن ايتتى.
تۇرعىندار ۇيلەرىنىڭ اينالاسى قورشاۋمەن قورشالعانىن دا سىنعا العان. اكىم بۇل اقپاراتتى راستادى: قورشاۋ تەك تۇرعىندار كوشىپ كەتكەن ۋچاسكەلەردە عانا ورناتىلعان.
