Almatynyń 2040 jylǵa deiingi jańartylǵan Bas josparynda qoǵamdyq kólikti damytýǵa basymdyq berilgen. Atap aitqanda, metro jelisin keńeitý, LRT-nyń alǵashqy jelisin iske qosý, BRT júiesin damytý jáne arnaiy jolaqtardy engizý kózdelip otyr. Almaty kólik jáne kommýnikatsiialar kolledji direktorynyń orynbasary Marat Jaidarovtyń aitýynsha, bul ózgerister mamandar daiarlaý júiesine de áser etip, quzyretter qurylymyn ózgertedi, dep habarlaidy Dalanews.kz.
– Zamanaýi metro jáne LRT poiyzdary, elektrobýstar men BRT avtobýstary – bul tsifrlyq basqarý júieleri, tartqysh jetekter, borttyq diagnostika, qaýipsizdik pen bailanys júielerimen jabdyqtalǵan joǵary tehnologiialy kólikter. Sondyqtan elektronika, qýatty elektrotehnika, avtomatika, baǵdarlamalyq-apparattyq keshender, monitoring júieleri men jasandy intellekt salasynda jumys istei alatyn mamandarǵa suranys artady, – dedi ol.
Marat Jaidarovtyń aitýynsha, jolaýshylar tasymalynyń artýy qaýipsizdik mádenietine, jabdyqty aldyn ala tekserý men diagnostikalaýǵa qoiylatyn talaptardy kúsheitedi. Sonyń nátijesinde jańa mamandyqtar men salalyq baǵyttar paida bolady.
– Qoǵamdyq kólikti damytý – bul ekologiia men turǵyndardyń jailylyǵyna salynǵan investitsiia ǵana emes, sonymen qatar joǵary bilikti tehnikalyq eńbek naryǵyn qalyptastyrý, – dedi spiker.
Aita keteiik, qazir Almatyda megapolisti 2040 jylǵa deiin damytýǵa arnalǵan negizgi qala qurylysy qujaty – Bas josparǵa engiziletin túzetýler boiynsha qoǵamdyq talqylaýlar ótip jatyr.
