Resei armiiasynyń sapynda soǵysyp jatqandardyń deni yńyrshaǵy shyqqan kedei. Joqshylyq olardyń psihologiiasyn buzǵan. Áleýmettik jaǵdaiyn túzeý úshin qolyn qanǵa malýdan taiynbaidy.
Ýkrain jerinde oqqa ushyp, súiegi kómýsiz qalaryn oilanyp jatpaidy. Pýtin propagandasy kedeilerden quralǵan Resei armiiasyn dýalap tastaǵan.
Mundai pikirdi "Bashqurt" saiasi uiymynyń belsendisi, Resei biligi tarapynan qýdalaýǵa ushyraǵan Rýslan Ǵabbazov bildirdi dep habarlaidy Dalanews.kz.
«Kópshilik reseilikter úshin joqshylyqtyń qamytynan qutylýdyń jalǵyz joly soǵysqa qatysyp, járdemaqy alý. Olardyń arasynda Pýtindi pir tutatyn, Kreml kósemi úshin ot pen sýǵa túsýden taiynbaityn zombilanǵan aýditoriianyń qarasy kóp. Propaganda olardyń et pen súiegine ótip ketken», – deidi sarapshy.
Orystyń bodanyndaǵy ózge respýblikalar, onyń ishinde Bashqurstan turǵyndarynyń basym bóligi turmystyq máselesin sheshýdi kózdep Resei armiiasynyń qataryna qosylýda.
Qaiyrshylyqtyń shegine jetken jurt qolyna qarý alyp, bógde eldiń beibit turǵyndaryn óltirýden taiynbaidy. Eń bastysy, aqysyn tólese bolǵany. Jumys tappai sendelip júrgen bashqurttyń er-azamattary aqsha úshin ar-uiattan attaýǵa májbúr.
Sói degen Ǵabbazov Pýtinge bolysyp jatqan bashqurttardyń bul tobyn ózindik saiasi ustanymy joq, Kremldiń úgit-nasihatyn qorytpai qabyldai beretin saýatsyz kategoriianyń qataryna kirgizipti.
Onyń pikirinshe, Máskeýdiń ýaǵyzyna ýlanǵan bashqurttardyń bir toby Pýtinniń shapqynshylyǵyn qylmys sanamaidy. Kerisinshe, Kreml kósemine shań jýytpai, onyń árbir áreketin aqtap alýǵa ázir.
«Joǵarydan (Pýtinnen) Qazaqstandy shabyńdar degen buiryq tússe, bizdegi bashqurttardyń basym kópshiligi uzaq oilanbai kórshi elge basyp kiredi. Qazaq men bashqurttyń bir kindikten taraityn baýyrlas ult ekeni olardyń qaperine de kirip shyqpaidy. Propaganda bashqurttardy dýalap tastaǵan, biz túrki dúniesinen kún ótken saiyn alystap baramyz», – deidi Ǵabbazov.
Onyń atap ótkenindei, Ýkrain jerinde oqqa ushqandardyń arasynda egde jastaǵy azamattar kóp. Júris-túrisi aýyrlaǵan elý-alpystaǵy shal-shaýqannyń qolyna qarý alyp, bógde elde ajal qushyp jatqany Pýtin propagandasynyń arqasy. 
Al Reseilik telearnalarǵa telmirgen Bashqurtstan turǵyndary Solovev pen Simoniannyń tuzaǵyna qalai ǵana túskenin ańdamai qalǵan.
«Ýkrainamen soǵysqa attanǵan bashqurttar qoisha qyrylyp jatyr. Bógde elde jan tapsyrǵan jaýyngerlerdiń sany boiynsha Bashqurtstan kósh bastap tur!
Soǵystyń bastalǵanyna 150 kúnnen asty, osy ýaqyttyń ishinde 150 bashqurt jan tásilim etken. Kún saiyn bir bashqurt oqqa ushýda. Bashqurttar Pýtinniń basqynshy saiasatyn qoldap, qolyn qanǵa maldy, qylmysker atandy. Keler urpaq bizdi keshirmeidi.
Alaida bul tek resmi málimet. Maidan dalasynda tankiniń tabanynda taptalyp, esepke alynbai, súiegi qýrap qalǵan sarbazdar qanshama», – deidi sarapshy.
Ǵabbazov Pýtinniń tusynda avtonomdy aimaqtarǵa jasalatyn qysymnyń kúrt kúsheigenin aitady. Ásirese, Bashqurtstan sekildi azat oilaityn azdy-kópti aýditoriiasy bar aimaqtar Kremldiń qaharyna ushyraǵan.
«Ýkrainaǵa basyp kirgen Pýtin bashqurttarǵa aiaýshylyq tanytpaidy. Qarsylasar bolsaq, qanǵa bóktiredi. Máskeý turǵyndaryn soǵysqa súiregisi joq, oǵan biz sekildi buratana ulttardyń soǵysta ólip, qatary siregeni tiimdi.
Soǵys bastalǵaly beri Bashqurtstannyń jer qoinaýyndaǵy qazba bailyqty qotarý jumysy qarqyn aldy.
Kreml Bashqurtstannyń tabiǵi resýrsy men adami resýrsyn túgesýde. Ýkrainadaǵy qandy qasapqa attanyp jatqan avtonomdy respýblikalardyń turǵyndary Pýtin úshin qul-qutan ǵana...», – deidi Ǵabbazov.
Ázirlegen, Dýman BYQAI
