Mass-medıada QR Qylmystyq kodeksiniń 274-baby boıynsha qozǵalǵan birqatar qylmystyq ister aıasynda tergeý organdary azaptaý qoldandy degen jalǵan aqparat taraýda. Bul týraly Qazaqstan Respýblıkasynyń Bas prokýratýrasy málimdedi, dep habarlaıdy Dalanews.kz
Vedomstvonyń habarlaýynsha, keıbir tulǵalar QR Qylmystyq-prosestik kodeksinde kózdelgen zańdy tergeý áreketterin – jaýap alýǵa qatysý, jaýap alý júrgizý, sondaı-aq sottyń úıqamaq túrindegi bultartpaý sharasyn tańdaýyn qasaqana azaptaý retinde kórsetip, qoǵamdy adastyrýda.
Bas prokýratýra Qazaqstan zańnamasynda «azaptaý» uǵymy naqty aıqyndalǵanyn eske saldy. QR QK-niń 146-babyna sáıkes, azaptaý laýazymdy tulǵanyń tán nemese psıhıkalyq zardapty qasaqana keltirýi bolyp tabylady. Bul norma BUU-nyń Azaptaýlarǵa qarsy konvensıasyna jáne Ystambul hattamasyna tolyq sáıkes keledi.
Qazirgi tańda prokýratýra organdary atalǵan qylmystyq ister boıynsha tergeýshiler tarapynan zańsyz áreketter nemese azaptaý faktilerin tirkegen joq. Barlyq prosesýaldyq áreketter zań talaptaryna sáıkes júrgizilýde.
Sonymen qatar Bas prokýratýra kórineý jalǵan aqparat taratý, sondaı-aq sotqa deıingi tergep-tekserýdi júzege asyratyn tulǵalardyń qyzmetine aralasý úshin qylmystyq jaýapkershilik kózdelgenin eskertti.
Aıta keteıik, buǵan deıin QazTAG agenttiginiń bas redaktory Ámir Qasenov Almaty qalasynyń polısıasy tarapynan tergeý jáne azaptaýdyń zańsyz ádisteri qoldanylǵany týraly málimdeme jasaǵan edi.
Sonymen qatar, Orda.kz jelilik basylymynyń bas redaktory jáne negizin qalaýshy Gúlnar Bajkenovanyń advokaty Murat Adam qorǵalýshysynyń ózin jáne redaksıasyn reıderlik basyp alýdan qorǵaýǵa múmkindigi joq úıqamaqta ekenin aıtyp, málimdeme jasaǵan. Advokattyń aıtýynsha, tergeý soty úıqamaq sıaqty bultartpaý sharasyn negizsiz tańdap alǵan.
