Endi bilim ordalarynyń basshylaryna bir orynda kóp otyrýyna jol berilmeýge tiis. Bul naýqanǵa – memlekettik mektepke deiingi, orta bilim berý, tehnikalyq jáne kásiptik, orta bilimnen keiingi jáne qosymsha bilim berý uiymdarynyń birinshi basshylary iligedi. Qaǵida solar arasyndaǵy laýazymdyq aýysý tártibin aiqyndaidy.
Tek zeinetkerlikke shyǵýyna 3 jáne odan az ýaqyt qalǵan direktorlar ǵana rotatsiialaýdan bosatylady. Bul úshin onyń ózi ótinish jazýy shart.
Sonymen, rotatsiia 3 jylda 1 ret júrgiziledi. Bul rette qaǵidada "attestattaý nemese memlekettik bilim berý uiymdarynyń birinshi basshysy qyzmetiniń tiimdiligin jyl saiynǵy baǵalaý qorytyndysy" eskeriletini basa aitylǵan. Iaǵni, eger bul synaqtardan súrinse, aýysý da muń bolady, múldem bilim berý júiesinen qýylýy yqtimal.
Direktorǵa baǵalaýdy oblystardyń jáne úsh megapolistiń bilim basqarmasynyń kadr qyzmeti júrgizedi. Direktorǵa beriletin baǵa ol basqaratyn mekteptegi oqý-ádistemelik jáne tárbie qyzmetiniń sapasyna, bilim alýshylarynyń bilim deńgeiine bailanysty bolady.
Barlyq direktorǵa aýysýdan bir ret bas tartýyna múmkindik berilmek.
Memlekettik bilim berý uiymynyń birinshi basshysy alǵash ret jazbasha bas tartqan jaǵdaida, onymen eńbek sharty taǵy 3 jylǵa uzartylady.
Eger ol ekinshi ret jazbasha bas tartsa, onda Eńbek kodeksiniń 49-babynyń 7)tarmaqshasyna sáikes, ol atqaratyn laýazymynan bosatylady. 2021 jylǵy 1 qyrkúiektegi jaǵdai boiynsha 5 jáne odan kóp jyl bilim berý uiymynyń basshysy bolǵan tulǵalar mindetti túrde rotatsiialaýǵa jatady. Rotatsiialaý osy qaǵidalar qoldanysqa engizilgen sátten bastap 3 ai ishinde júzege asyrylady, – dep túsindirdi BǴM.
Qujatta mektep direktorlaryn bulaisha "sapyrylystyrýdyń" ne úshin qajet ekeni kórsetilgen. Birinshiden, osy arqyly "bilim berý uiymdary jumysynyń tiimdiligin jáne bilim berý qyzmetteriniń sapasyn arttyrý" maqsat etiledi. Ekinshiden, birinshi basshylardyń kásibi áleýeti men basqarýshylyq tájiribesin tiimdi paidalaný kózdelýde. Úshinshiden, rotatsiia – direktorlardyń basqarýshylyq biliktiligin kásibi damytýǵa jáne jetildirýge túrtki bolady dep kútilýde.
Tórtinshiden, osylaisha, birinshi basshylardyń kásibi turalap qalýynyń, jumysta "kásibi janyp ketýiniń" (orysshasy "professionalnoe vygoranie") aldyn alý josparlanýda. Besinshiden, sybailas jemqorlyqqa soqqy berilmek. Óitkeni bir ornynda kóp otyrǵan direktorlardyń ásirese, ata-analar arasynda tamyr-tanystary kóbeiip, barmaq basty, kóz qysty tirlikter óristeýi ǵajap emes.
Janat Ardaq
