Májilismenniń aitýynsha atyshýly Operator ROP-tyń túpki iesi - Áliia Nazarbaeva. Daýly is boiynsha suraý alynǵan kýágerler de kompaniianyń Nazarbaevtyń kenje qyzyna tiesili ekenin aitqan.
"Alaida buǵan sot ta, Bas prokýratýranyń ókilderi de nazar aýdarmady. Muny qalai túsinemiz?", - deidi daǵdarǵan depýtat.
Áliianyń sybailasy sanalǵan Ekologiia vitse-ministri Ahmetjan Pirimqulovtyń biylǵy jyldyń shildesinde jeti jylǵa sottalǵanyn aita ketý kerek. Oǵan kompaniianyń top-menedjerlerimen aýyz jalasyp, 26,8 mlrd teńgeni qymqyrdy, budan bólek qoqys órteitin alty zaýyttyń qurylysyna bólingen 180 mlrd teńgeni jymqyrmaq boldy degen aiyp taǵylǵan.
Kompaniianyń atqarýshy direktory Rýslan Shámshiev byltyrǵy jyldyń 26 qazanynda asylyp qalǵan. Saiasatker Sanjar Boqaev tergeýdiń aldynda kóz jumǵan Shámshievtiń ózine qol jumsaǵanyna kúmán keltirgen.
"Shámshiev sýitsid jasaǵan joq, onyń ajaly adamnan keldi. Tergeýshiler bir jyl boiy marqumnyń týǵan-týystaryn adastyryp kelgen. Onyń denesindegi aiǵaqtar Shámshievtiń ózdiginen asylyp ólmegenin rastaidy. Máskeýlik sarapshylar mundai uiǵarymǵa kelgen qazaqstandyq áriptesterdiń sheshimin joqqa shyǵaryp otyr. Ilgeridegi faktilerdi esepke ala kele, onyń óz-ózine qol jumsamaǵanyn kóremiz", – degen bolatyn Dalanews-ke pikir bildirgen saiasatker.
Buǵan deiin "Operator ROP"- taǵy qarjy jymqyrý isine bailanysty sot otyrysynda aiyptalýshylardyń biri, kompaniianyń eks-qarjy direktory Rústem Temirbek Áliia Nazarbaevany sotqa shaqyrýdy talap etken.
Áliia Nazarbaeva "Operator ROP" kompaniiasynyń quryltaishysy bolǵan. Temirbektiń sózinshe, Nazarbaevanyń aqsha alǵanyn dáleldeitin qujattar bar.
Sot otyrysynda Rústem Temirbek Áliia Nazarbaevanyń Recycling Company arqyly 5,8 milliard teńge, ózge de kompaniialar arqyly taǵy 5 milliard teńge alǵanyn málimdedi.
"Eger tergeý Nazarbaeva Áliianyń aqshany bir qaltasynan ekinshi qaltasyna salýyn urlyq dep eseptese, nege ony tym bolmaǵanda kýáger retinde tergemeidi. Árine, Elbasynyń qyzyn tergeýge shaqyrý Antikordyń qolynan kelmeidi", – degen edi Temirbek.
