ماجىلىسمەننىڭ ايتۋىنشا اتىشۋلى وپەراتور روپ-تىڭ تۇپكى يەسى - ءاليا نازاربايەۆا. داۋلى ءىس بويىنشا سۇراۋ الىنعان كۋاگەرلەر دە كومپانيانىڭ نازاربايەۆتىڭ كەنجە قىزىنا تيەسىلى ەكەنىن ايتقان.
"الايدا بۇعان سوت تا، باس پروكۋراتۋرانىڭ وكىلدەرى دە نازار اۋدارمادى. مۇنى قالاي تۇسىنەمىز؟"، - دەيدى داعدارعان دەپۋتات.
ءاليانىڭ سىبايلاسى سانالعان ەكولوگيا ۆيسە-مينيسترى احمەتجان ءپىرىمقۇلوۆتىڭ بيىلعى جىلدىڭ شىلدەسىندە جەتى جىلعا سوتتالعانىن ايتا كەتۋ كەرەك. وعان كومپانيانىڭ توپ-مەنەدجەرلەرىمەن اۋىز جالاسىپ، 26،8 ملرد تەڭگەنى قىمقىردى، بۇدان بولەك قوقىس ورتەيتىن التى زاۋىتتىڭ قۇرىلىسىنا بولىنگەن 180 ملرد تەڭگەنى جىمقىرماق بولدى دەگەن ايىپ تاعىلعان.
كومپانيانىڭ اتقارۋشى ديرەكتورى رۋسلان شامشييەۆ بىلتىرعى جىلدىڭ 26 قازانىندا اسىلىپ قالعان. ساياساتكەر سانجار بوقايەۆ تەرگەۋدىڭ الدىندا كوز جۇمعان شامشييەۆتىڭ وزىنە قول جۇمساعانىنا كۇمان كەلتىرگەن.
"شامشييەۆ سۋيسيد جاساعان جوق، ونىڭ اجالى ادامنان كەلدى. تەرگەۋشىلەر ءبىر جىل بويى مارقۇمنىڭ تۋعان-تۋىستارىن اداستىرىپ كەلگەن. ونىڭ دەنەسىندەگى ايعاقتار شامشييەۆتىڭ وزدىگىنەن اسىلىپ ولمەگەنىن راستايدى. ماسكەۋلىك ساراپشىلار مۇنداي ۇيعارىمعا كەلگەن قازاقستاندىق ارىپتەستەردىڭ شەشىمىن جوققا شىعارىپ وتىر. ىلگەرىدەگى فاكتىلەردى ەسەپكە الا كەلە، ونىڭ وز-وزىنە قول جۇمساماعانىن كورەمىز"، – دەگەن بولاتىن Dalanews-كە پىكىر بىلدىرگەن ساياساتكەر.
بۇعان دەيىن "وپەراتور روپ"- تاعى قارجى جىمقىرۋ ىسىنە بايلانىستى سوت وتىرىسىندا ايىپتالۋشىلاردىڭ ءبىرى، كومپانيانىڭ ەكس-قارجى ديرەكتورى رۇستەم تەمىربەك ءاليا نازاربايەۆانى سوتقا شاقىرۋدى تالاپ ەتكەن.
ءاليا نازاربايەۆا "وپەراتور روپ" كومپانياسىنىڭ قۇرىلتايشىسى بولعان. تەمىربەكتىڭ سوزىنشە، نازاربايەۆانىڭ اقشا العانىن دالەلدەيتىن قۇجاتتار بار.
سوت وتىرىسىندا رۇستەم تەمىربەك ءاليا نازاربايەۆانىڭ Recycling Company ارقىلى 5،8 ميلليارد تەڭگە، وزگە دە كومپانيالار ارقىلى تاعى 5 ميلليارد تەڭگە العانىن مالىمدەدى.
"ەگەر تەرگەۋ نازاربايەۆا ءاليانىڭ اقشانى ءبىر قالتاسىنان ەكىنشى قالتاسىنا سالۋىن ۇرلىق دەپ ەسەپتەسە، نەگە ونى تىم بولماعاندا كۋاگەر رەتىندە تەرگەمەيدى. ارينە، ەلباسىنىڭ قىزىن تەرگەۋگە شاقىرۋ انتيكوردىڭ قولىنان كەلمەيدى"، – دەگەن ەدى تەمىربەك.
