Májilis depýtaty Baqytjan Bazarbek Almatyda ótken "Qairat" – "Real Madrid" kezdesýine qatysty pikir bildirdi. Ol oiynnyń ózine emes, uiymdastyrý sapasyna nazar aýdardy, dep habarlaidy Dalanews.kz.
Depýtattyń aitýynsha, stadionǵa kirý protsesi nashar deńgeide uiymdastyrylǵan.
"Kireberistegi jaǵdai bes baldyq shkalamen baǵalar bolsaq, múldem qanaǵattanarlyq emes. Bileti bar jankúierlerdiń ózi ishke kire almai, úlken kezek pen dúrbeleń týyndady. Qatarda balalar da boldy. SOBR, IIM men ishki ásker qyzmetkerleri kóptep turǵanyna qaramastan, olar eshqandai kómek kórsetpei, tek qarap turdy. Jankúierlerdi tezirek kirgizýge bolar edi", – dedi ol.
Uiymdastyrýshylar muny kezekte kóptegen "biletsizderdiń" turǵanymen túsindirgen. Alaida depýtattyń pikirinshe, daýys zoraitqyshty qoldanyp, qolynda bileti barlardy birinshi kezekte ótkizý keregin habarlaý qajet edi.
Nátijesinde oiyn saǵat 21:30–21:45 aralyǵynda bastaldy. Kóptegen jankúier alańǵa 5, 10, 15, tipti 20 minýttan keiin ǵana kirgen.
"Jýrnalist Mihail Kozachkov ta uiymdastyrý tómen deńgeide bolǵanyn atap ótti. Buǵan qosa, biletterdiń baǵasy óte qymbat boldy. Aqsha tólegen adamdar eń bolmaǵanda minimaldy jailylyqty kútken. Biraq oǵan qol jetkize almady", – dedi Bazarbek.
Depýtattyń aitýynsha, match kezinde kóptegen biletsiz adamdar tribýna ótetin joldarǵa jaiǵasyp alyp, qozǵalysqa kedergi keltirgen.
"Búgin "Qairat" tuńǵysh ret Chempiondar ligasynda oinap otyr. Eger biz sol deńgeige shyqsaq, onda tek alańdaǵy oiynmen ǵana emes, uiymdastyrýda da joǵary standarttarǵa sai bolýymyz kerek. Alda keminde úsh match bar. "Qairat" fýtbol klýby men Almaty ákimdigi tiisti qorytyndy shyǵaryp, jankúierlerge qaýipsizdik pen jailylyqty qamtamasyz etedi dep senemin", – dedi depýtat.
Sonymen qatar, Bazarbek matchqa shamamen 5000 biletti "Samuryq-Qazyna", "Báiterek" holdingteri men ulttyq kompaniialar qyzmetkerleriniń satyp alǵany týraly aqparatty tekserýdi talap etti.
"Eger bul rastalsa, onda zańdy suraq týyndaidy: biletter jekelegen qyzmetkerlerdiń jeke qarajatyna alyndy ma, álde memlekettik resýrstar jumsaldy ma? Biýdjet qarajatyn mundai maqsatqa paidalaný múlde jol berilmeitin nárse!", – dedi ol.
Sondai-aq depýtat quqyq qorǵaý jáne antimonopoliialyq organdardy bilet satylymyndaǵy yqtimal alypsatarlyq shemalardy tekserýge, olardy kóterme satyp alǵan tulǵalar men kompaniialardy anyqtap, jaýapqa tartýǵa shaqyrdy.
"Asa qymbat baǵaǵa bilet alǵan adamdar adaldyq pen ashyqtyqty kórýge tiis, qoldan jasalǵan tapshylyq pen kúmándi shemalardy emes", – dep túiindedi Baqytjan Bazarbek.
