QR Ulttyq Banki ekinshi deńgeidegi bankter úshin eń tómen rezervtik talaptardy (ETRT) arttyrý ótimdilik profitsitin qysqartyp, infliatsiianyń baiaýlaýyna alyp keledi dep sanaidy, dep habarlaidy Dalanews.kz.
QR Ulttyq Bank Basqarmasy 2025 jylǵy 25 shildede "Qazaqstan Respýblikasy Ulttyq Banki Basqarmasynyń keibir qaýlylaryna eń tómen rezervtik talaptar (budan ári – ETRT) máselesi boiynsha ózgertýler men tolyqtyrýlar engizý týraly" qaýlyny bekitti.
"Ózgertýler ETRT quralyn Ulttyq Banktiń QRUB aqsha-kredit saiasaty quraldaryn jetildirý jáne antiinfliatsiialyq baǵytty kúsheitý aiasynda engiziledi. Usynylyp otyrǵan túzetýler EAEO, Ortalyq Aziia jáne Kavkaz elderi ortalyq bankteriniń halyqaralyq ETRT qoldaný tájiribesin zerdelep, taldaý negizinde ázirlendi. Osy elderde (Qazaqstandy esepke almaǵanda) ulttyq valiýtadaǵy mindettemeler boiynsha ETRT normativteriniń ortasha deńgeii 4–4,5%-dy, al shetel valiýtasyndaǵy mindettemeler boiynsha shamamen 15%-dy quraidy. Qazaqstanda ETRT normativteriniń deńgeii aimaqta eń tómeni bolyp keldi – teńgedegi mindettemeler boiynsha tiimdi mólsherleme – 1,3%, al shetel valiýtasyndaǵy mindettemeler boiynsha – 2,5%", delingen Ulttyq Banktiń baspasóz habarlamasynda.
Qujatta teńgedegi mindettemeler boiynsha – 3,5% jáne 5%, valiýtalyq mindettemeler boiynsha – 10% jáne 15% normativter belgilendi.
"Bul rette bank sektoryn engiziletin ózgeristerge beiimdeý maqsatynda MRT normativteri maqsatty deńgeige kezeń-kezeńimen bir jyl ishinde kóteriletin bolady", - deidi Ulttyq Bank.
Ortalyq bank qabyldanǵan sharalar aqsha agregattarynyń shamadan tys ósýin tómendetýge, aqsha-kredit saiasatynyń transmissiiasyn jaqsartýǵa múmkindik beredi, bul infliatsiiaǵa qarsy kúrestiń tiimdiligin arttyrady dep sanaidy.
Ulttyq Banktiń basty maqsaty – infliatsiiany 5%-ǵa deiin tómendetý. Osy maqsatqa qol jetkizý úshin qolda bar barlyq qural paidalanylady.
Bir sózben aitqanda, QR Ulttyq Banki eń tómen rezervtik talaptar mólsherlemesin joǵarylatý arqyly bankterdi nesiege berýdiń ornyna rezervte kóbirek aqsha ustaýǵa májbúr etedi. Mundai shara, ádette ekonomikadaǵy aqsha mólsherin shektep ustaýǵa múmkindik beredi. Bul sheshim naryqqa birden áser etti. 13 tamyzda 1 AQSh dollarynyń baǵamy 542,66 teńgeden 537,96 teńgege deiin kúrt tómendedi. Quldyraý 4,7 teńgeni nemese 0,86% qurady.
Bir qyzyǵy bul jaitqa amerikalyq JPMorgan banki nazar aýdarǵan.
"Keshe tańerteń bir kúndik qorlandyrý mólsherlemeleriniń kúrt ósimi baiqaldy, óitkeni naryq Ulttyq Banktiń mindetti rezervter normasyn arttyrý týraly sheshimine kesh "jaýap qatty". Bul USDKZT baǵamynyń tómendeýine yqpal etti, búgin tańerteń 537 teńgeden sál joǵary somada saýda-sattyq jalǵasty. Menińshe, biz teńgege shaqqanda amerialyq valiýta baǵamyna qatysty shaǵyn ári qysqa pozitsiiany ashtyq, jazǵy baǵa dinamikasynan keiin azdap kúmán bary ras, biraq 545 teńge deńgeii saqtalyp, Ulttyq Banktyń valiýtany ETRT arttyrý arqyly qoldaýǵa nietti ekeniniń kýási boldyq" dep Eldar Shamsýtdinov óz Telegram arnasynda JPM túsiniktemesin keltiredi.
Onyń aitýynsha, amerikalyq bank ETRT-ny qatańdatý men teńgeniń kúsh alýynda tikelei bailanys baryn aitady.
"JPM teńge ETRT-ǵa qatysty sheshim qabyldaýdyń arqasynda nyǵaidy dep esepteidi, ol ótimdilikti naryqtan joidy, al teńgeni tartymdy etti. Jaǵdai shynymen de solai bolsa, onda nyǵaiý áseri tehnikalyq sipatqa ie jáne biraz ýaqyttan keiin teńge qaita álsireýi múmkin", - deidi Eldar Shamsýtdinov.
Sonymen qatar maman AQSh – Ýkraina – EO – Reseidiń aldaǵy kelissózderin de eskerý kerektigin aitady, óitkeni osy turǵyda naryqta dúdámal kúi áli saqtalyp otyr.
Aita ketsek, búgin, 2025 jyly 14 tamyzda Ulttyq Banktiń resmi bekitken 1 AQSh dollarynyń baǵamy 537,96 teńgeni quraidy.
Buǵan deiin saitymyzda "Qarjy sarapshylary qyrkúiekte 1 AQSh dollarynyń quny qansha bolatynyn aitty" degen maqala jariialanǵan bolatyn.
