Grek-rım kúresinen U20 quramasynyń jattyqtyrýshysy Aıdyn Sársekeev jaqynda ótken Azıa chempıonatyndaǵy qyzyqty jaıtpen bólisti. Bapker Qyrǵyzstandaǵy qurlyq chempıonatyna óz qarajatymen barǵan. Bishkekke baryp-qaıtýǵa jetetin aqshany tabý úshin ol bedeldi bankten 500 myń teńge kóleminde kredıt alypty. Bul týraly ol Sportbugin.kz tilshisine bergen suhbatynda aıtty, dep habarlaıdy Dalanews.kz.
20 jasqa deıingi balýandar arasyndaǵy Azıa chempıonaty Qyrǵyzstan astanasy Bishkekte ótti. Bul básekege qatysatyn quramanyń barlyq shyǵynyn Olımpıadalyq daıarlaý ortalyǵy kóterýi tıis. Alaıda, bul uıym búdjet jetispeýshiligin alǵa tartyp, jarysqa qatysatyn balýandardyń bireýin qysqartýdy usynǵan.
“Maǵan tolyq qurammen barmaı, bir balýandy alyp tastaýdy ótindi. Óıtkeni barlyǵynyń shyǵynyn kóterýge ortalyqtyń qarajaty jetpeıdi eken. Biraq bári jarysqa bara jatqanda, bir balýandy kózin jáýteńdetip tastap ketkim kelmedi. Bapker retinde maǵan bólingen qarajatty sportshyǵa berip, komandanyń jarysqa tolyq quramda barǵanyn qaladym. Al ózim bankten 500 myń teńge kredıt aldym. Jol shyǵyny, jatyn oryn men tamaqqa barlyǵy 480 myń teńge ketti. Kelgen soń osy shyǵynnyń bárin uıymǵa kórsetip, esep berdim. Olar bul qarajatty qaıtaryp berýge ýáde etti”, — deıdi Sársekeev.
Sondaı-aq, Bishkektegi Azıa chempıonatyna qatysatyn quramaǵa biryńǵaı sporttyq forma berilmegen. Tipti, balýandar marapattaý rásimine bir-biriniń formasyn kıip shyǵýǵa májbúr bolǵan.
“Forma berilmedi. Tamyz aıyndaǵy álem birinshiligine deıin daıyn bolady dep jatyr. Biraq Azıa chempıonatyna formasyz, árkimniń ózinde bar kıimmen bardyq. Bylaısha aıtqanda, alapes bolyp júrdik”, — deıdi Aıdyn Sársekeev.
Osy jaǵdaıǵa baılanysty, Olımpıadalyq daıarlaý ortalyǵynyń basshysy Jandos Úshkempirovke habarlastyq. Alaıda, ortalyq basshysy bul jaǵdaıdan beıhabar bolyp shyqty.
“Forma berildi emes pe? Sizge qaıtadan habarlasamyz” dedi ol.
Keıin Olımpıadalyq daıarlaý ortalyǵy basshysynyń orynbasary Ádilet Kýsmanov osy jaǵdaıǵa qatysty pikir bildirdi.
“Kúres túrlerinen Bishkekte ótken Azıa chempıonatyna komanda formasyz bardy. Onyń sebebi joq emes. Buǵan deıin túrli jas deńgeıindegi komandalarǵa forma tigýdi bir uıym qolǵa alýy tıis edi. Biraq bul is aıaqsyz qaldy da, biz formany qaıtadan óz qolymyzǵa aldyq. Azıa chempıonatyna deıin forma tigip úlgermedik, endi tamyzda ótetin álem chempıonatyna forma daıyn bolady. Vetnamda ótken U17, U23 Azıa birinshiligine forma berildi. Basshymyz sol forma jaıly aıtqan shyǵar. Al Aıdyn Sársekeevke keletin bolsaq, onymen bul jaǵdaı kelisildi. Biz sportshylardy qysqartýdy suradyq, ol óz ornyn balýanǵa berip, óz erkimen nesıe aldy. Barlyq sportshyny qarjylandyrýǵa búdjet qarajaty jetkiliksiz”, — dedi Kýsmanov.
