گرەك-ريم كۇرەسىنەن U20 قۇراماسىنىڭ جاتتىقتىرۋشىسى ايدىن سارسەكەيەۆ جاقىندا وتكەن ازيا چەمپيوناتىنداعى قىزىقتى جايتپەن ءبولىستى. باپكەر قىرعىزستانداعى قۇرلىق چەمپيوناتىنا ءوز قاراجاتىمەن بارعان. بىشكەككە بارىپ-قايتۋعا جەتەتىن اقشانى تابۋ ءۇشىن ول بەدەلدى بانكتەن 500 مىڭ تەڭگە كولەمىندە كرەديت الىپتى. بۇل تۋرالى ول Sportbugin.kz تىلشىسىنە بەرگەن سۇحباتىندا ايتتى، دەپ حابارلايدى Dalanews.kz.
20 جاسقا دەيىنگى بالۋاندار اراسىنداعى ازيا چەمپيوناتى قىرعىزستان استاناسى بىشكەكتە ءوتتى. بۇل باسەكەگە قاتىساتىن قۇرامانىڭ بارلىق شىعىنىن وليمپيادالىق دايارلاۋ ورتالىعى كوتەرۋى ءتيىس. الايدا، بۇل ۇيىم بيۋدجەت جەتىسپەۋشىلىگىن العا تارتىپ، جارىسقا قاتىساتىن بالۋانداردىڭ بىرەۋىن قىسقارتۋدى ۇسىنعان.
“ماعان تولىق قۇراممەن بارماي، ءبىر بالۋاندى الىپ تاستاۋدى ءوتىندى. ويتكەنى بارلىعىنىڭ شىعىنىن كوتەرۋگە ورتالىقتىڭ قاراجاتى جەتپەيدى ەكەن. ءبىراق ءبارى جارىسقا بارا جاتقاندا، ءبىر بالۋاندى كوزىن جاۋتەڭدەتىپ تاستاپ كەتكىم كەلمەدى. باپكەر رەتىندە ماعان بولىنگەن قاراجاتتى سپورتشىعا بەرىپ، كوماندانىڭ جارىسقا تولىق قۇرامدا بارعانىن قالادىم. ال ءوزىم بانكتەن 500 مىڭ تەڭگە كرەديت الدىم. جول شىعىنى، جاتىن ورىن مەن تاماققا بارلىعى 480 مىڭ تەڭگە كەتتى. كەلگەن سوڭ وسى شىعىننىڭ ءبارىن ۇيىمعا كورسەتىپ، ەسەپ بەردىم. ولار بۇل قاراجاتتى قايتارىپ بەرۋگە ۋادە ەتتى”، — دەيدى سارسەكەيەۆ.
سونداي-اق، بىشكەكتەگى ازيا چەمپيوناتىنا قاتىساتىن قۇراماعا ءبىرىڭعاي سپورتتىق فورما بەرىلمەگەن. ءتىپتى، بالۋاندار ماراپاتتاۋ راسىمىنە ءبىر-بىرىنىڭ فورماسىن كيىپ شىعۋعا ءماجبۇر بولعان.
“فورما بەرىلمەدى. تامىز ايىنداعى الەم بىرىنشىلىگىنە دەيىن دايىن بولادى دەپ جاتىر. ءبىراق ازيا چەمپيوناتىنا فورماسىز، اركىمنىڭ وزىندە بار كيىممەن باردىق. بىلايشا ايتقاندا، الاپەس بولىپ جۇردىك”، — دەيدى ايدىن سارسەكەيەۆ.
وسى جاعدايعا بايلانىستى، وليمپيادالىق دايارلاۋ ورتالىعىنىڭ باسشىسى جاندوس ۇشكەمپىروۆكە حابارلاستىق. الايدا، ورتالىق باسشىسى بۇل جاعدايدان بەيحابار بولىپ شىقتى.
“فورما بەرىلدى ەمەس پە؟ سىزگە قايتادان حابارلاسامىز” دەدى ول.
كەيىن وليمپيادالىق دايارلاۋ ورتالىعى باسشىسىنىڭ ورىنباسارى ادىلەت كۋسمانوۆ وسى جاعدايعا قاتىستى پىكىر ءبىلدىردى.
“كۇرەس تۇرلەرىنەن بىشكەكتە وتكەن ازيا چەمپيوناتىنا كوماندا فورماسىز باردى. ونىڭ سەبەبى جوق ەمەس. بۇعان دەيىن ءتۇرلى جاس دەڭگەيىندەگى كوماندالارعا فورما تىگۋدى ءبىر ۇيىم قولعا الۋى ءتيىس ەدى. ءبىراق بۇل ءىس اياقسىز قالدى دا، ءبىز فورمانى قايتادان ءوز قولىمىزعا الدىق. ازيا چەمپيوناتىنا دەيىن فورما تىگىپ ۇلگەرمەدىك، ەندى تامىزدا وتەتىن الەم چەمپيوناتىنا فورما دايىن بولادى. ۆەتنامدا وتكەن U17، U23 ازيا بىرىنشىلىگىنە فورما بەرىلدى. باسشىمىز سول فورما جايلى ايتقان شىعار. ال ايدىن سارسەكەيەۆكە كەلەتىن بولساق، ونىمەن بۇل جاعداي كەلىسىلدى. ءبىز سپورتشىلاردى قىسقارتۋدى سۇرادىق، ول ءوز ورنىن بالۋانعا بەرىپ، ءوز ەركىمەن نەسيە الدى. بارلىق سپورتشىنى قارجىلاندىرۋعا بيۋدجەت قاراجاتى جەتكىلىكسىز”، — دەدى كۋسمانوۆ.
