Bıylǵy jyldyń qarasha aıyna qaraı qazaqstandyq bankterdiń aktıvteri 58,5 trln teńgege jetti, bul bir aı burynǵy kórsetkishke qaraǵanda, 0,6%-ǵa kóp. Kórsetkishtiń jyldyq ósimi 20,8%-dy qurady. Aktıvterdi ustaýshy bankterdiń úzdik ondyǵy arasynda aılyq dınamıka boıynsha bes ekinshi deńgeıdegi bank ǵana oń kórsetkish kórsetti, al jalpy sektor boıynsha tek toǵyz bank bar, dep jazady Dalanews.kz.

Ulttyq bank málimetterine súıene otyryp, Ranking.kz bir aılyq ósim boıynsha Bank RBK kósh bastap turǵanyn naqtylaıdy: ósim 3,8%-ǵa, 2,3 trln teńgege deıin artty. Bir jyl ishinde bank aktıvteri birden 28,1%-ǵa ósti, bul sektor boıynsha aıtarlyqtaı úzdik kórsetkishterdiń biri.

Al qarjy ınstıtýtynyń nesıe portfeli 1,3 trln teńgege jetti, bir aıda 0,9%-ǵa, bir jylda 38%-ǵa ulǵaıdy. Bank kredıtteriniń jalpy kólemindegi NPL 90+ úlesi bar bolǵany 3,1%-dy qurady, bir jyl buryn bul kórsetkish 3,3%-ǵa teń bolatyn.

Aıta keterligi, osy kúzde Moody’s halyqaralyq reıtıńtik agenttigi Bank RBK-nyń uzaqmerzimdi depozıttik reıtıńterin "Turaqty" boljammen Ba3 deńgeıinen Ba2 deńgeıine deıin, sondaı-aq kredıttik qabilettiliktiń negizgi baǵasyn (BCA) jáne túzetilgen BCA-ny b1 deńgeıinen ba3 deńgeıine deıin kóterdi. Sonymen qatar agenttik banktiń qysqamerzimdi reıtıńterin de rastady, aktıvter sapasy men strategıasynyń aıtarlyqtaı ári turaqty túrde jaqsarýyna oń baǵa berdi, bank iri korporasıalarǵa kredıt berý jáne táýekeli tómen bólshek saýda esebinen táýekeli tómen modeldi ustanady.

Qazaqstandaǵy úzdik EDB arasynda aktıvterdiń aı saıynǵy ósimi boıynsha İİ-orynǵa Kaspi Bank jaıǵasqan: ósim 3,3%-ǵa, 7,7 trln teńgege deıin artty. Osy kezeńde banktiń nesıe portfeli 3,8%-ǵa kóbeıdi, al ondaǵy tólem merzimi kóp ótip ketken kredıtterdiń úlesi bir jyl burynǵydaı 4,9%-dy qurady.

Úzdik úshtikti Bank SentrKredıt túıindeıdi: bank aktıvteriniń qorjyny 2,7%-ǵa, 6,2 trln teńgege deıin tolyqty. Qarjy ınstıtýtynyń kredıttik portfeli bir aıda 1,7%-ǵa ósti, al ondaǵy NPL 90+ úles salmaǵy 1,5%-dy qurady.

"Sondaı-aq Halyk Bank (1,4% ósimmen) jáne Freedom Bank (1% ósimmen) bir aıda oń nátıjege qol jetkizdi. Aktıvter boıynsha úzdik ondyqqa enbeıtin EDB arasynda Bank VTB Qazaqstan, Qytaı SÓB, Nurbank jáne Home Credit Bank aı saıynǵy kórsetkishter boıynsha oń dınamıka kórsetti. Bul oraıda QR EDB-nyń jıyntyq nesıe portfeli qarasha aıyna qaraı 33,8 trln teńgege jetti, bul bir aı burynǵy kórsetkishke qaraǵanda, 1,2%-ǵa jáne bir jyl burynǵy kórsetkishke qaraǵanda, 20,4%-ǵa kóp. Al tólem merzimi 90 kúnnen astam ótip ketken kredıtterdiń úlesi ótken jyldaǵydaı 3,3%-dy qurady", delingen taldaýda.