Qazaqstanda jyl saiyn balalarǵa qatysty mańyzdy zańdar engizilip jatyr, dep habarlaidy Dalanews.kz.
Negizgi jańashyldyqtardyń biri - balalarǵa kúsh qoldanýǵa tolyq tyiym salý. 2024 jylǵy 16 maýsymnan bastap Qazaqstanda kámeletke tolmaǵandarǵa jasalǵan zorlyq-zombylyqqa qatysty jańa ózgerister kúshine endi. Beldikpen nemese qolmen urý endi QR Qylmystyq kodeksiniń 109-1-babyna jatady. Bul bap boiynsha 50 táýlikke deiin qamaýǵa alý nemese 100-200 AEK kóleminde aiyppul kózdelgen (2026 jyly 1 AEK - 4325 teńge).
Sonymen qatar, 16 jasqa deiingi balalar ákimshilik jaýapkershilikke tartylmaidy, olardyń áreketi úshin ata-ana jaýap beredi. Iaǵni QR Ákimshilik quqyqbuzýshylyq týraly kodeksiniń 127-babyna sáikes bala tárbiesin tiisinshe atqarmaǵany úshin ata-ana jazalanady.
Odan bólek, kámeletke tolmaǵan balanyń kózinshe alkogol ne temeki tutyný ata-ana mindetin buzý sanalady. Mundai jaǵdaida 10 AEK mólsherinde aiyppul salynady. Bul "Qazaqstan Respýblikasyndaǵy bala quqyqtary týraly" zańda bekitilgen salaýatty ómir saltyn nasihattaý mindetine negizdelgen.
Quqyqbuzýshylyq bir jyl ishinde qaitalansa, aiyppul 15 AEK-ke deiin ósedi, sondai-aq, 5 táýlikke deiin qamaý qoldanylýy múmkin. Al ata-ana alkogoldi ózi tutynyp qana qoimai, ony balaǵa bergen jaǵdaida jaza qatańdaidy: 20 AEK-ke deiin aiyppul nemese 10 táýlikke deiin ákimshilik qamaý qarastyrylǵan.
