Ol bul týraly óziniń Instagram paraqshasynda bólisti. Ánshi tipti ulyna oryssha sóileýge tyiym salǵan.
– Birde dúkenge bardyq. Balam oryssha jaqsy biletindikten: «Mama, kýpi mne etý igrýshký, pojalýista. Ona mne ochen nravitsia!» – dedi. Birden, óz ádetime salyp, qataldyq tanytyp: «Sóileme oryssha! Nemene qazaq tilin úiretpegen be?!» – dep urysa qaldym. Ánshi bolǵasyn daýysym jarqyn shyqty. Jan-jaǵymdaǵylar qarap, estip, «Zachem tak, iz-za iazyka rýgat rebenka» – degendei pikir bildirip jatty.
Osyny aityp turǵan ózimizdiń qarakóz kelinshekter. Anany estip, men de qoimai: «Qazaqsha sóile, áitpese tilińdi julyp alamyn!!!» – dedim. Janymdaǵylar birtúrli qarap, birdeńeni aityp myńǵyrlap jan-jaqqa ketti. Ózim bolsam, tilimdi maqtan tutyp, riza boldym sol jerde! Tilimizdi qurmetteiik, – dep jazdy ol.
Birde ánshi balabaqshadan ulynyń oryssha sóilep kelgenin kórip, sol baqshadan shyǵaryp alǵan eken.
– Qaibir jyly, Astanada «Alpamys» balabaqshasyna ulymdy qazaqsha topqa berdim. Eki aptadan soń ulym tek oryssha sóilei bastady. Sebebin bilgim kelip, tárbieshige aitpai, bir kúni tekserýge bardym. Tárbieshiler oryssha sóileidi dep oiladym. Barsam, esik ashyq bári oryssha sairap otyr. Apai qazaqsha suraq qoiady, balalar oryssha jaýap berip otyr. Sondaǵysy, 10 balanyń 8-i oryssha sóileidi. Qalǵan ekeýi (bireýi meniń ulym) álgi segizine qosylyp otyrady eken. Oilanbastan dál sol mezette qujattaryn alyp, balabaqshadan shyǵaryp aldym.
Apaiymyz: «Biz ne istei alamyz? Balalar úilerinde oryssha sóileidi, baqshada til úiretkenimiz zaia ǵoi!» – dep qaldy…
Til máselesinde ar – ol seniń keleshek urpaǵyń úshin jaýapkershilik! Sen dál osy úlken jaýapkershilikti sezinip, óz Ana tilińdi qorǵai alasyń ba? Iá! Árine! Namysyń bolsa, qorǵaisyń!
Árqaisysymyz ózimizden, otbasymyzdan bastaiyq!, – deidi Móldir Áýelbekova.
