Balalarymyzdyń densaýlyǵy qymbat
Elimizdegi tótenshe jaǵdaiǵa bailanysty is-sharalardy kúsheitý maqsatynda oqý protsesi jańa oqý jylynda qashyqtan bastaldy. QR Bilim jáne ǵylym ministrligi tórtinshi toqsandaǵy betpe-bet kezdesken qiyndyqtardy joiyp, jańa oqý jylynda qashyqtan oqý protsesiniń sapasyn jaqsartý maqsatynda jaz boiyna daiyndyq sharalaryn júrgizdi.
Muǵalimderdiń biliktiligin arttyratyn «Órleý» BAUO» AQ filialdarynyń aǵa oqytýshylary men mazmuny jańartylǵan bilim berý baǵdarlamasy boiynsha trenerleri ustazdarmen úzdiksiz bailanys jasap, onlaiyn rejiminde ártúrli platformalarda sabaq ótýdiń tiimdi joldaryn úiretti.
WhatsApp áleýmettik jelisi boiynsha ata-analar jinalysy bolyp, qashyqtan oqý týraly barlyq málimetter aldyq. Ata-analardyń suraqtaryna mektep direktory Bokisheva Gaýhar Maýythanqyzy men synyp jetekshimiz Gúljan Jumaqanqyzy jaýap berip, bárimizdi sabyrlyqqa, shydamdy bolýǵa, birge bolýǵa shaqyryp, qoldaý kútetinin jetkizdi.
Baiqap qarasańyz, bilim berý júiesi ýaqytty utymdy paidalanyp, qashyqtan sabaq oqytýdyń barlyq múmkindikterin tynymsyz qarastyrýda. Árine tizbelei bersek, qashyqtan sabaq ótýdiń qiyndyǵy jeterlik. Ásirese, muǵalimderdiń jumysy eselep artty, ata-ana tek óz balasynyń oqý úlerimin qadaǵalasa, muǵalim qansha synypta sabaq ótse, sonsha synyptaǵy oqýshynyń sabaq úlgerimin qadaǵalap, úzdiksiz bailanysta bolýy kerek. Biraq munyń bári ýaqytsha qiyndyqtar dep bilemin. Bizge balalarymyzdyq densaýlyǵy qymbat. Biraz shydamdylyq tanytyp, bir-birimizge qoldaý bildirip, balalarymyzǵa da kómektesýimiz kerek dep oilaimyn.
Mine, jańa oqý jylynyń ekinshi aptasy óte shyqty. Alǵashqy kúnderi ǵalamtor jelisiniń baiaýlyǵynan oqýshy men muǵalimniń irkilissiz bailanysqa shyǵa almai qinalǵan sátteri boldy. Ekinshi aptanyń alǵashqy kúnderi sabaq oqý barysyndaǵy keleńsizdikter seiile bastady. Qazirgi ýaqytta ata-ana balasyna eń jaqsy bilim beretin qosymsha resýrstardy izdestirip, ýaqytyn tiimdi paidalanýyna múmkindik mol.
1-qyrkúiekte jasaǵan Memleket basshysy Qasym-Jomart Toqaev Qazaqstan halqyna Joldaýynda sapaly bilim alý úshin ádettegidei sabaqqa qatysyp, muǵalimdermen jáne synyptastarmen aralasýdyń orny bólek ekendigin atap ótip, sanitarlyq talaptardy saqtai otyryp, bilim alýdyń qalyptasqan dástúrli tásiline qaita kóshýdiń tártibin ázirleýge tapsyrma berdi. Endeshe, indet qaýpinen saqtaný úshin úige «qamalǵan» qiyn sátterdi eńserip, dástúrli bilim alý úlgisinde balalarymyzdyń sabaǵyn jalǵastyratyn kúnge aman-esen jeteiik!
Perýza ASYLBEK, ata-ana.
Almaty qalasy
