“Air Astana” áýe kompanıasy eresektersiz jalǵyz ushatyn balalar úshin jańa ereje engizdi, dep habarlaıdy Dalanews.kz.

Kompanıanyń málimetine sáıkes, budan bylaı jalǵyz saıahatqa shyǵatyn balalardyń ata-anasy tasymaldaý qyzmetine arnaıy alym tóleıdi. 

“Eresektersiz jolǵa shyǵatyn 6 jastan 15 jasqa deıingi balalardy tasymaldaý úshin arnaıy alym tóleýi qajet. Onyń quny bir baǵytqa — 9 750 teńge nemese 20 AQSH dollary”, — delingen habarlamada.

Bul qarjyǵa bort qyzmetkerleri balany áýejaıda tirkelgen sátten bastap, baratyn jerdegi jaýapty tulǵamen kezdesýine deıin alyp júredi. Kishkentaı jolaýshylar ushaqqa birinshi bolyp minip, sońǵy qatarda otyrady. Al ekıpaj olardyń qaýipsizdigin qamtamasyz etedi.

Zańdy ókilder balany stúardessalarǵa tapsyrý úshin áýejaıǵa ushý ýaqytynan keminde 1,5-2 saǵat buryn kelýi qajet. Balalardy ushaqpen jalǵyz tasymaldaý barysynda elektrondyq qujattardy qoldanýǵa ruqsat etilmeıdi.