Qostanai qalasynyń ákimi Marat Júndibaev muǵalimderdi jazǵy ýaqytta sý jaǵalaýlaryna kezekshilikke shyǵarýdy usyndy. Alaida ákimdikke qarasty bilim basqarmasy bul usynysqa narazalyq bildirdi, dep habarlaidy Dalanews.kz 31 arnaǵa silteme jasap.
Telearnanyń málimetinshe, Qostanaida pedagogtar ákimniń jańa bastamasyna narazy. Qala basshysy sý jaǵalaýyndaǵy kezekshilikke muǵalimderdi tartýdy usynǵan. Marat Júndibaevtyń aitýynsha, bul sheshim oqýshy balanyń sýǵa ketip, qaiǵyly oqiǵa oryn alǵannan keiin pisip-jetilgen. Alaida muǵalimder demalysyn reidke arnaýǵa áste daiyn emes.
"Keibireýler:"Nege muǵalimderdi nemese áldebireýdi májbúrleý kerek" dep mynda ashýlanyp jazyp jatyr. Sonda reidtik is-sharalardy kim ótkizedi, politsiia da, tótenshe jaǵdailar da adam qoly jetkiliksiz bolsa? Bul - bizdiń jalpyǵa ortaq jumysymyz. Muǵalimder 40 kún demalady, alaida biraz ýaqyttan keiin olar mektepti jóndeý jáne t.b. jumystarǵa tartylady. Osy atqarǵan jumystary úshin qosymsha aqy alady, sol sekildi muny da uiymdastyrýǵa bolady dep oilaimyn", - deidi Júndibaev.
Alaida, qala basshysynyń bul aitqany pedagogtar arasynda túsinbeýshilik týdyrdy. Óitkeni demalys kezinde balalardyń ómiri men qaýipsizdigi úshin ata-analar jaýapty. Sondai-aq, bilim basqarmasyndaǵylar da muǵalimder patrýlmen ainalysýǵa mindetti emes ekenin aityp otyr.
"Memleket basshysy pedagogterdi beiindi emes jumystarǵa tartýǵa nemese májbúrleýge jol berilmeitinin birneshe ret atap ótti. Bul másele buzýshylyqtar oryn alǵan jaǵdaida jedel áreket etý turǵysynda bizdiń oblysta da erekshe baqylaýda,. Pedagogtardyń quqyqtary saqtalady, ózderiniń fýnktsiiasyna jatpaityn isterge tartylmaidy", - dedi Qostanai oblysy ákimdigi bilim basqarmasynyń baspasóz hatshysy Anna Lazareva.
Depýtattar pedagogtarǵa sabaqtan tys júktemeni júkteý tájiribesi kópten beri umytylǵanyn atap ótti. Al muǵalimniń mártebesi týraly zań boiynsha ózender men kólderge reidter júrgizý degen múmkin emes.
"Muǵalimder sabaq berýi kerek, olar ádistemelik jaǵyn pisirýi tiis, biliktiligin arttyrýy qajet, al jazǵy demalys jaǵalaýǵa reid júrgizý úshin berilmeidi. Bul - ákimniń tikelei jaýapkershiligi, azamattardyń sý aidyndarynda shomylý qaýipsizdigin qamtamasyz etý", - dedi QR Parlamenti Májilisiniń depýtaty Irina Smirnova.
