Qazaqstanda qoǵamdyq orynda balaǵat sóz qoldanǵan azamattar kýágerler bolmasa da jaýapkershilikke tartylýy múmkin. Bul týraly Ishki ister ministrligi málimdedi, dep habarlaidy dalanews.kz.
Vedomstvonyń túsindirýinshe, qoǵamdyq jerde beiádep, bylapyt sózder aitý Ákimshilik quqyq buzýshylyq týraly kodekstiń 434-babyna sáikes usaq buzaqylyq retinde qarastyrylady.
Mundai quqyq buzýshylyq úshin shamamen 86 myń teńge kóleminde aiyppul salý nemese 15 táýlikke deiin ákimshilik qamaýǵa alý jazasy kózdelgen. Eger azamat bul áreketti bir jyl ishinde qaitalap jasasa, qamaý merzimi 20 táýlikke deiin uzarýy múmkin.
IIM ókilderiniń aitýynsha, basty nazar quqyq buzýshylyqtyń qoǵamdyq sipatta jasalýyna aýdarylady.
«Qoǵamdyq oryndarda aitylǵan balaǵat sózder janynda adamdar bolmasa da quqyq buzýshylyq retinde tirkelýi múmkin. Eger bul derek beinekameralardaǵy jazbalarmen nemese basqa da dáleldermen rastalsa, azamat jaýapkershilikke tartylady», – dep túsindirdi ministrlik.
Quqyq qorǵaý organdary mundai faktilerdi patrýldeý kezinde, internet keńistigin baqylaý barysynda jáne azamattardyń «102» qyzmetine nemese elektrondy júieler arqyly joldaǵan ótinishteri negizinde anyqtaidy.
