Tranzit týraly kelisimge qol qoiylǵan ýaqyttan bastap Baký – Tbilisi – Djeihan baǵyty boiynsha Qazaqstan munaiynyń shamamen 3,4 mln tonnasy tasymaldandy, dep habarlaidy Dalanews.kz.
"Astanada "QazMunaiGaz" UK AQ (QMG) Basqarma tóraǵasy Ashat Hasenov Ázerbaijan memlekettik munai kompaniiasynyń (SOCAR) prezidenti Rovshan Nadjafpen kezdesti.Baký – Tbilisi – Djeihan baǵyty boiynsha kómirsýtek tasymaldaýdyń qazirgi jai-kúii men aldaǵy josparlary talqylandy. Tranzit týraly kelisimge qol qoiylǵan ýaqyttan bastap bul baǵyt boiynsha QMG men SOCAR-dyń enshiles kompaniialary ("Qazaqteńizkólikfloty" jáne ASKO) paritet negizde Qazaqstan munaiynyń shamamen 3,4 mln tonnasyn tasymaldaǵany atap ótildi", delingen QMG baspasóz qyzmetiniń habarlamasynda.
Taraptar QazMunaiGaz, SOCAR, Tatneft jáne Ózbekneftegaz kompaniialary jasasqan Tsifrlyq tehnologiialar jáne ónerkásiptik qaýipsizdik salasyndaǵy tórtjaqty memorandýmdardyń iske asý barysy týraly pikir almasty. Atap aitqanda, QMG Injiniring pen SOCAR mamandary óndiriste ozyq tsifrlyq sheshimderdi engizý boiynsha ózara tájiribe almasýda.
Sonymen qatar taraptar óndiristik qaýipsizdik pen eńbekti qorǵaý baǵytyndaǵy ortaq is-sharalar josparlaryn júzege asyryp, tehnogendik sipattaǵy TJ kezinde áreket etýmen bailanysty oqý-jattyǵýlar ótkizedi.
"QazMunaiGaz SOCAR-men strategiialyq yntymaqtastyqty nyǵaitýdy kózdeidi. Ol Qazaqstanmen Ázerbaijannyń tranzittik áleýetin damytýǵa, sondai-aq qazaqstandyq munaidyń halyqaralyq naryqqa eksportyn ulǵaitýǵa baǵyttalǵan. Qol qoiylǵan kelisimder aiasynda biz tsifrlandyrý jáne ónerkásiptik qaýipsizdik salasyndaǵy ortaq jumysymyzdy jalǵastyramyz. Sonymen qatar Ázerbaijan áriptesterimen geologiialyq barlaý, tómen kómirtekti damytý, birlesken investitsiialyq jobalardy jáne Kaspii teńiziniń jaǵdaiyn jaqsartý baǵytyndaǵy sharalardy iske asyrýda ózara is-qimyldy keńeitýge múddelimiz", — dedi Hasenov.
Buǵan deiin ulttyq kompaniia áleýmettik jelide tarap jatqan sybysqa qatysty ún qatqan bolatyn. Daqpyrt "QazMunaiGaz" UK AQ Direktorlar keńesi men Basqarma múshelerine tólengen syiaqy kólemine qatysty.
