Baǵanashyldaǵy oqiǵadan keiin Almaty oblysynyń ákimi Marat Sultanǵazievtiń taǵdyry kúmán týdyryp otyr. Bul týraly "Chemodan gossekretov" sarapshylary aitty, dep habarlaidy Dalanews.kz.
"Bizdiń derekkózderimizdiń málimetinshe, Prezident Ákimshiliginde Almaty oblysynda qyzmettik tergeý júrgizý úshin jedel top qurylǵan. Onyń mindetine jerdi naqty kimge bermek bolǵanyn anyqtaý, sondai-aq oblystaǵy jer daýlaryna qatysty qosymsha tekserý júrgizý kiredi. Marat Sultanǵazievtiń ákim retindegi bolashaǵy úlken kúmán týdyryp otyr", - deidi sarapshylar.
Al májilis depýtaty Baqytjan Bazarbek Almatydaǵy "Baǵanashyl" balalar úii tóńiregindegi jaǵdaiǵa bailanysty Almaty oblysynyń ákimine qatysty málimdeme jasady.
"Baǵanashyldaǵy balalar úii tóńiregindegi bassyzdyq pen qoǵamǵa berilgen ýádesin oryndamaǵany úshin men Prezident Qasym-Jomart Toqaevtan Almaty oblysynyń ákimi Marat Sultanǵazievtiń otstavkasyn suraimyn!", – dep jazdy Baqytjan Bazarbek Facebook-tegi paraqshasynda.
Depýtat sondai-aq áleýmettik jelide video jariialap, barlyq iske nege Prezident aralasýy kerektigin jáne bul ýaqytta oqý-aǵartý ministri qaida bolǵanyn surady.
"Nege bul máseleni ("Baǵanashyl" balalar úiine qatysty – red.) oqý-aǵartý ministri naqty ári ashyq túrde kótermedi? Bul – balalar úii. Bul uiym tek ákimdikke ǵana emes, oqý-aǵartý ministrliginiń de quzyrynda. Qaida júr Beisembaev myrza (oqý-aǵartý ministri Ǵani Beisembaev – red.)?" – dedi Baqytjan Bazarbek.
Depýtat balalar úiine qatysty jaǵdaidyń ashyq bolmaǵanyn jáne ǵimaratqa bailanysty qorytyndynyń jariialanbaǵanyn taǵy da atap ótti.
"Nelikten Májilis depýtaty retinde men bul qorytyndymen tanysa almaimyn? Nege bul qujatty jasyryp otyr?" – dep surady Bazarbek.
Sonymen qatar, depýtat "QazNIISA" (qurylys salasyndaǵy memlekettik ǵylymi-zertteý jáne jobalaý institýty) nelikten bul jaǵdaiǵa tartylmaǵanyna tańǵaldy.
"Nelikten túsiniksiz, beimálim bir JShS bul qorytyndyny jasap jatyr?" – dep narazylyq bildirdi Bazarbek.
Buǵan deiin Bazarbek balalar úiine qatysty iste qujattardy jasyrý men aqparattyq shabýyldar baryn aitqan. Ol balalar úii ornalasqan jer telimi kimge tiesili ekenin suraǵan. Sondai-aq úshinshi taraptan ǵimarattyń memlekettik jáne tehnikalyq saraptamasynyń qorytyndysy men túrli kelisimderdi alǵanyn da jetkizgen.
