Túrkistan oblysynda ınvestısıa tartý arqyly jańa jumys oryndaryn ashý baǵytynda jumystar jandanyp keledi. Osy baǵytta Ordabasy aýdany «Badam» ındýstrıaldy aımaǵynda jańa ınvestısıalyq jobalardyń qurylysy bastalǵan bolatyn. Oblys ákimi Darhan Satybaldy Ordabasy aýdanyna arnaıy issaparmen baryp, alúmını profıl buıymdaryn shyǵaratyn «Central Asia Aluminum Company» JSHS-in aralap, jumys barysyn baqylady. Zaýyttyń qurylysymen tanysqan óńir basshysy kásipkerlermen pikirlesti,  dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap. 

– Bizdiń óńirde jumys oryndaryn ashý mańyzdy. Sol sebepti óńirde iske qosylǵan árbir zaýyt óńir ekonomıkasynyń damýyna úles qosady. Sondyqtan ınvestısıalyq jobalarǵa turaqty qoldaý kórsetiledi. Osy zaýyttarda bizdiń turǵyndar jumys isteıdi, – dedi Darhan Satybaldy.

Badam ındýstrıaldy aımaǵynda «Sentral Asia Aluminum company» kompanıasynyń alúmını profıl buıymdaryn óndirý zaýytynyń qurylysy júrgizilýde. Jobanyń ınvestısıalyq quny 4 mlrd. 400 mln.teńge, Jobanyń birinshi kezeńi 2025 jyldyń naýryz aıynda iske qosylyp, 200 jergilikti turǵyndy jumyspen qamtıdy. Jyldyq qýattylyǵy – 10 myń tonna. Al ekinshi kezeńi iske qosylǵanda 150 jumys orny ashylmaq.

İssapar aıasynda Badam aýylyndaǵy «RZN» JSHS-niń avtoklabtalǵan gazoblok shyǵaratyn zaýytynyń jumysymen tanysty. Jobanyń ınvestısıalyq quny 1 mlrd. 500 mln. teńgeni. quraıdy, al qýatylyǵy jylyna 85 myń tekshe metr. Joba tolyqtaı iske asqan kezde 25 adam jumyspen qamtylady. Jer aýmaǵy – 3 gektar.

Óńir basshysyna balalar oıyn alańshalaryn shyǵaratyn zaýyt pen ınovasıalyq temirbeton shyǵarý zaýytynyń, metal ónimderin óndirý jobasynyń qurylys barysy tanystyryldy. Bul kásiporyndarda 100-ge jýyq jumys orny qurylmaq.

Aýdandaǵy zaýyttardy aralap kórgen oblys ákimi memleket tarapynan usynylǵan jer ýaqtyly ıgerilip, kásiporyndar óz merziminde ashylýy kerek ekenin jetkizdi. Sonymen birge ındýstrıaldy aımaqty abattandyryp, kógaldandyrý qajettigin, jergilikti turǵyndardy úıretip, jumysqa tartý kerektigin eskertti.