13 sáýirde Almatydaǵy №12 qalalyq klinikalyq aýrýhanasynyń 20 meditsinalyq qyzmetkeriniń koronavirýs juqtyrǵany belgili boldy. Artynan bul aýrýhananyń bútindei karantinge jabylǵany jariialandy. Jelide osy aýrýhananyń koronavirýsqa shaldyqqan travmotolog dárigeri - Didardyń videosy paida boldy, dep habarlaidy Dalanews.kz.
Almatylyq dáriger Didar Merkidegi áriptesi Tolqynai sekildi ózderiniń qorǵanys quraldarymen tolyqtai qamtamasyz etilmegenin ashyp aityp, quzyrly organ men Prezidentten óz isterine qatysty ádil tekserý júrgizýdi suraidy.
Sondai-aq ol ózi jumys isteitin aýrýhanany ǵana emes, elimizdiń barlyq óńirindegi aýrýhanalardy jappai tekserýdi, sóitip koronavirýstyń taralý oshaǵyn der kezinde aýyzdyqtaýdy suraidy.
Bul video jýrnalist Maqsat Tolyqbaidyń Facebook-tegi paraqshasynda jariialandy.
- Biz basynda tek meditsinalyq maskamen júrdik. Al pnevmoniia, jótelgen naýqastardyń barlyǵy tótenshe jaǵdai jariialanǵannan bastap bizge aǵylyp túsip jatty.
Biz bolsaq, bir maskamen júrdik, túsinesizder me? Arnaiy kiim, arnaiy maska, kózildirik degen sekildi qorǵanys quraldary bizde bolǵan joq.
Mine, bertinge deiin, tek 7 sáýirde ǵana bere bastady ony bizge. Bári kesh bolǵanda. Osylai indet oshaǵyna ainaldyq. Aitaiyn degenim, tekserýdi ádil júrgizsin. Biz otbasymyz úshin, qyzmettik abyroiymyz úshin alańdaimyz. Eń durysy, koronavirýs kóptep tarap ketpesin demese, Qazaqstannyń barlyq aýrýhanasyn teksersin. Qaladaǵy bizdegi jaǵdai mynaý, al óńirlerde ne bolyp jatyr, ony elestetýdiń ózi qiyn? Munda jappai aýrý juqtyrǵandar - bári karantinde, bári taldaý nátijesin kútip, bir-birimiz úshin alańdap otyrmyz, - deidi videoda almatylyq dáriger.
