Birqatar bankter Sherzat Bolattyń otbasyna tiesili nesielerdi keshirdi. Olardyń keibiri Talǵardaǵy azyq-túlik dúkenin damytý maqsatynda alynǵan bolatyn. Dál osy jerde qaiǵyly oqiǵa bolǵan edi, dep habarlaidy Dalanews.kz.
Quqyq qorǵaýshylardyń málimetinshe, 16 jastaǵy Sherzattyń otbasy qaiyrymdylyq maqsatynda qarajat jinaý boiynsha keńes alý úshin olarǵa júgingen.
- Bizdi mazalaǵan basty suraq - bul qarjy qandai maqsatqa jinalyp jatyr? Nelikten jinaq Sherzattyń ákesiniń týysy Perizattyń atyna ashylǵan? Sebebi ol bul istiń tikelei qatysýshysy emes. Biz dereý komandamyzdyń bul bastamaǵa eshqandai qatysy joq ekenin málimdedik. Sondai-aq, tek Sherzattyń ata-anasy men olardyń balalarynyń múddesin qorǵaitynymyzdy naqty aittyq, - dedi Aitbek Amangeldi baspasóz máslihatynda.
Onyń aitýynsha, qorǵaýshylar bul qarajattyń naqty ne úshin jinalǵanyn túsine almaǵan, sebebi olardyń tarapynan barlyq qyzmet tegin kórsetilgen.
- Bankter de otbasyǵa qoldaý kórsetýge niet bildirdi. Otbasynyń bes banktegi barlyq derlik nesie tólemderi toqtatyldy. Túrli nesie túrleri boldy, onyń ishinde azyq-túlik dúkeni úshin alynǵan kásipkerlik nesielerdiń bir bóligi tolyqtai keshirildi, - dep naqtylady Aitbek Amangeldi.
Onyń sózinshe, Talǵardaǵy belgisiz bireýler órtegen úiden keiin de otbasy qiyn jaǵdaida qalmaǵan.
- Keiinnen barlyq taýar satylyp, otbasy sot protsesi aiaqtalǵanǵa deiin kún kórýge jetkilikti qarjy jinady. Biz olardyń asa muqtaj emestigin túsindik. Órtten keiin otbasyǵa qajetti kiim-keshek pen basqa da zattardy satyp alyp berdik. Tipti, psihologtyń keńesimen balalarǵa arnalǵan oiyn-saýyq taýarlaryn da aldyq. Munyń barlyǵy Sherzattyń otbasy úshin tegin usynyldy, dep túiindedi Aitbek Amangeldi.
Quqyq qorǵaýshy Saida Táýkelova da Sherzattyń otbasyna «dos-seriktester» tarapynan qaiyrymdylyq kómek kórsetilgenin atap ótti.
"Ókinishke qarai, demeýshilerimizdiń biri otbasy baspanaǵa qarajat jinai bastaǵannan keiin kómekten bas tartty. Sondyqtan keibir qarjylyq máselelerdi bizdiń komandamyz óz qarajatymen japty", dedi ol.
Aitbek Amangeldi marqum Sherzattyń otbasy bastapqyda sot protsesine qatysqysy kelmegenin aitty.
- Buryn otbasy músheleri sotqa qatysqysy kelmeitinin jetkizgen edi. Meniń mindetim - sotqa ne úshin kelmegenderin anyqtaý bolatyn. Sońynda biz olarmen qarapaiym hat almasý arqyly qoshtastyq. Alaida osy kezdesýden eki saǵat ótken soń Qarjaý maǵan habarlama jiberdi. Ol otbasyn qorǵaýǵa qatysqan barlyq advokattardan bas tartyp, basqa zańger jaldaitynyn aitty, - deidi Aitbek.
Sonymen qatar, Sherzattyń otbasy iske jańa bes advokattyń qosylǵanyn málimdedi.
- Keshe ǵana jańa advokattarǵa senimhat berilgeni belgili boldy. Sot isine taǵy bes zańger qosyldy. Osyǵan bailanysty biz óz tarapymyzdan ary qarai qatysýymyz kerek pe, degen suraq týyndady. Biz otbasy múshelerimen bailanysýǵa tyrystyq, biraq nátije bolmady. Sodan keiin bul áreketimizdiń esh nátije bermeitinin túsinip, protsesten shetteimiz dep sheshtik, - dedi Aitbek Amangeldi.
