Atam – Muhtar Áliev ómirden ótkesin araǵa eki ai salyp Avstriia túrmesinde ákem – Rahat Áliev óz-ózine qol saldy.
Taǵdyrdyń soqqysy munshalyqty aýyr bolaryn kim bilgen. Eńsem ezildi. Eseńgirep qaldym. Óne-boiym órtenip bara jatty. Qandai kúizeliske túskenimdi kórseńiz...
Osyndaida otbasym, ásirese atam Nursultan Nazarbaev barynsha qoldady meni. Qamqorlyq tanytty. Atam kúndiz 17 mln. adamnyń máselesin sheshse, keshke úige oralǵasyn nemeresiniń sharýasymen ainalysatyn. Sharmamaityn. Shaldyqpaityn. Anyǵynda, sezinbeitinmin. Onsyz da jumysbasty adam, maǵan kóńil bólip, asty-ústime túsýge qansha kúsh jumsaitynyn túsinbeitinmin. Mine, sol kezde álsizdik tanyttym. Shalt bastym. Qatelik jasadym.
Júrektegi júkti esirtkiniń kómegimen jeńildetpek boldym. Aldanyshty esirtkiden izdedim.
Iá, alǵashqyda aldanasyń. Álem kúlip-jainap ketkendei kórinedi. Alda seni muńsyz-qamsyz kúnder kútip turǵandai seziledi. Alǵashqyda ǵana... Artynan esirtki aǵzańdy ýlai bastaidy. Kúl-parshasyn shyǵarýǵa kóshedi. Aýyrasyń. Syrqatqa shaldyǵasyń. Alysqa ketseń, bittiń. Ajal kútip tur, seni. Bul – ý. Al ý jan-dúnieńdi emdemeidi eken.
Bul saǵan emes, otbasyńa da salmaq. Synaq. Úrei. Qaitpek kerek? Qaida barmaq kerek? El ne oilaidy? Meniń otbasymda da bastapqyda osylai boldy.
Úrei jaýlap aldy sanamyzdy.
Aqyry, atamnyń aldyna bardym. Moiyndadym.
Bálkim, onyń ornynda basqa prezident bolǵanda muny elden jasyrýǵa, jyly jaba salýǵa tyrysatyn shyǵar. Alaida, munyń meni atama, Nursultan Nazarbaevqa qatysy joq. Saspady da, shoshymady da. "Moiyndaǵanyń durys boldy. Azamatsyń. Iá, aýrýdy jeńý ońai emes. Biraq, saǵan senem. Jeńesiń. Eńseresiń" dedi ol.
Atamnyń aldynda esirtkige táýeldilikten arylýǵa ýáde berdim. "Aisultan ýáde berse, ony mindetti túrde oryndaidy" dedi atam.
Atamnyń aldynda qaryzdarmyn. Meni atam qutqaryp qaldy. Bir emes, eki ret qutqardy. Bálkim, alǵashqyda jas bolǵan shyǵarmyn, ómir kórmegendigim sebep bolǵan shyǵar. Biraq, bul joly qaitalanbaidy.
Iá, bul aýrýdy jeńý qiyn. Erik-jiger azdyq etedi buǵan. Em bolar dárisi de joq, biraq. Muny ashyq jazǵan sebebim, esirtki talai taǵdyrdy búldirdi, talai otbasynyń shańyraǵyn shaiqaltty. Budan arylýdyń jolyn bilem. Taptym. El-jurtpen bóliskim keledi. Ózim siiaqty "adasýdyń" alǵashqy satysynda turǵandardy qutqaryp qalǵym keledi.
Ómirinde bir ret te bolsa, nashaqorlyqpen betpe-bet kelgender túsinedi muny. Anyǵynda, nashaqorlyqqa shaldyqqandar emes, nashaqorlyqtyń ózimen kúresý kerek. Ol eshkimdi aiamaidy óitkeni. Jaqsyny da, jamandy da jalmaidy.
Aldaǵy ýaqytta nashaqorlyqqa qarsy kúres qaiyrymdylyq qoryn ashpaq oiym bar. Aitqanymdy, naqty ispen dáleldegim keledi. Aitpaqshy, Narcotics Anonymous halyqaralyq qaýymdastyǵyna alǵysymdy aitamyn. osy kúnge deiin júzdegen, myńdaǵan janǵa úmit syilady bul qaýymdastyq.
Esirtkimen aradaǵy kúres meniń ómirimdegi eń aýyr aiqas boldy. Anyǵynda, men óz-ózimmen kúrestim. Jeńdim.
Daiyndaǵan, Dýman BYQAI
