Tarazda basy daýǵa qalǵan №43 mektep direktory qyzmetinen shettetildi. Bilim jáne ǵylym ministri Ashat Aimaǵambetovtyń ózi osynadai pármen berdi. Elimizdiń bas ustazy shý shyqqan bilim oshaǵynyń basshysy pedagogikalyq etikaǵa jat ádet jasaǵanyn aityp otyr. Sondyqtan bul isti mai shammen qaraýǵa ýáde etti, dep habarlaidy Dalanews.kz KTK telearnasyna silteme jasap.
Bul daýdyń basy muǵalimniń beineúndeýinen bastaldy. Onda Kúnsulý Bórimbekova jumystan "negizsiz qýyldym" dep janaiqaiyn jetkizgen. "Japtym-jala, jaqtym, kúieniń qurbany boldym" degen ustaz prezident pen Bilim ministrinen arasha suraǵan.
Kúnsulý Bórimbekova:
- Bul direktor mektepke kelgeli ujymnyń berekesi qashty. Kóptegen muǵalimderdi jumystan ketirip, 20-25 jyldyq eńbek ótili bar muǵalimderi jumystan ketýge májbúrledi. Mine búgingi kúni sonyń bireýi men bolyp otyrmyn.
"Direktor mektepti menshigindei kóredi", - deidi Kúnsulý. Al muǵalimdermen dóreki sóilesý ádeti eken. Qit etseń, artyńa sham alyp túsedi degen 30 jyldyq eńbek ótili bar mamannyń sózin áriptesteri de rastap otyr. Olardyń aitýynsha, bilim oshaǵy bazarǵa ainalǵan.
Aigúl Kerimqulova, muǵalim:
- Dekrettiń jumystan shyqqan muǵalimderden 50 myńnan alatyn. Biylǵy jyly 100 myń bolypty stavkasy. Odan keiin artyq saǵat alý úshin muǵalimderge usynys tastaidy. 27 saǵat alsań - 50 myń, 24 saǵat alsań - 30 myń. Kádimgi bazar bolyp ketken bizdiń mektep. Al mektep direktory shýǵa sebep bolǵan Bórimbekovanyń mindetin durys atqarmaǵany úshin jumystan bosatylǵanyn aitady. Sondai-aq, ol ózine taǵylǵan barlyq aiypty joqqa shyǵardy.
Elmira Ómirbekova, №43 mekteptiń direktory:
- Bizdiń mektepte 114 muǵalim bar. Olardyń úsheýi daýlasqanyna meniń esh qarsylyǵym joq. Quqy bar. Biraq qarjy máselesine qatysty men zańnyń aiasynda sotqa júginý arqyly sheshim shyǵartqyzamyn. Birinshiden olar ony dáleldeýi kerek.
Ómirbekovanyń buǵan deiin de basy daýǵa ilikken. Alty jyl buryn №25 mekteptiń direktory bolǵan tusynda dál osy sebeppen ujymy qarsy shyqqan bolatyn. Ol kezde ýáj aitqandardy birden Aqordaǵa siltegen.
Elmira Ómirbekova, 7 naýryz, 2014:
- Baryńyz, baryńyz, Elbasy senderdi "qarsy alaiyn" dep otyr. Keremet "qarsy alaiyn" dep otyr.
Sol aiǵaidan keiin Ómirbekova qyzmetinen qýylyp, keiin sot arqyly qaita taǵaiyndalǵan-dy. Al úsh jyl buryn №43 mektepke aýysyp kelgen. Júrgen jeri aiǵai-shý bolǵan basshynyń áreketi ministrdiń qulaǵyna da jetipti.
Ashat Aimaǵambetov, QR Bilim jáne ǵylym ministri:
- Qazir komissiianyń tekserýi júrýde. Tekseris aiaqtalǵanǵa deiin direktordy jumysynan shekteýdi tapsyramyn. Úshinshiden pedetikalyq jaǵynan qylyqtary sáikes kelmeidi. Men videolardy da ádeii qarap shyqtym.
Ministr Ashat Aimaǵanbetov buny "keleńsiz jaǵdai" dep baǵa berdi. Ári der kezinde áreket qylmai, daýdy ýshyqtyryp alǵan jergilikti basshylardy qatań synady. Osy dóreki direktordyń kesirinen Bilim basqarmasy men qalalyq Bilim bóliminiń basshysy aýyzsha eskertý aldy.
https://www.youtube.com/watch?v=mpT8KDwvYpw
