Tólebı aýdanyń turǵyny Jandos Myrzametov memlekettik baǵdarlamasy aıasynda josparyn sátti iske asyryp, kilem jýý ortalyǵyn ashqan, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Ol aldymen aýdandyq jumyspen qamtý ortalyǵyna jumyssyz retinde tirkelip, «Bastaý Bıznes» oqý kýrsyn támamdaǵan.

Sondaı-aq, sertıfıkat alǵan azamattarǵa beriletin 583 400 teńge qarajatqa shańsorǵysh pen 500 sharshy metrge arnalǵan kilem keptirgish apparat satyp alǵan.

– Buǵan deıin ár túrli jerlerde jumys istep keldim. Sosyn ózim turaqty jumys ornyn ashýdy oıladym. Aqyldasa kele Leńgir qalasyna kilem jýatyn ortalyq kerek degen oıǵa keldim. Qatelespeppiz, qazirgi tańda suranys molynan bolyp tur. Ortalyǵymyzǵa «Lenger carpet» degen ataý berdik, – dedi J.Myrzametov.

Qazirgi tańda kilem jýý ortalyǵynda 5 adam jumyspen qamtylǵan. Olar aıyna shamamen 200 kilem jýýda. Ortalyq ıesi suranys artyp jatsa, kásip aýqymyn keńeıtemin dep otyr.

Aıta keteıik, aýdanda «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy josparly túrde iske asyrylyp keledi. Lengir qalasynyń ózinde 37 azamat bıznes josparyn sátti qorǵap, memelekettik grantqa ıe bolǵan.