Almaty oblysy «Teńizshevroıl» kompanıasymen áriptestikti nyǵaıtyp, munaı óndiretin kásiporynnyń qajettiligin qamtamasyz etýdi kózdep otyr. Jetisý jeriniń ónim óndirýshileri endi halyqaralyq kompanıaǵa azyq-túlik pen kásiptik kıim-keshek jetkizip turatyn boldy. Mundaı tıimdi kelisimniń nátıjesi oblys ákimi Qanat Bozymbaev pen «Teńizshevroıl» kompanıasynyń bas dırektory Kevın Laıonnyń kezdesýinen keıin belgili boldy, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap.

Kezdesýde oblystyń negizgi áleýmettik-ekonomıkalyq damý baǵyttary jaıly qysqasha áńgimelegen Qanat Bozumbaev:

– Búginde oblysymyzda óndiristiń barlyq salasy damyp keledi. Azyq-túlik taýarlary boıynsha elimizde óndiriletin jalpy ónimniń 42%-yn quraıtyn Jetisý jeri aldyńǵy orynda tur, – dep alǵa qoıylǵan maqsattardy tanystyryp ótti. – Osyǵan oraı logıstıka salasyn damytýdy belsendi júrgizip kelemiz. Óıtkeni, kórshiles Qytaıdan shyqqan júkterdiń eleýli bóligi Eýropaǵa bizdiń aımaq arqyly ótedi. Odan bólek, osy ýaqytqa deıin laıyqty damyp otyrǵan tigin ónerkásibin keńeıtip, taǵy bir tigin fabrıkasyn ashýdy qolǵa alyp jatyrmyz.

Sondaı-aq, qurylys materıaldary men basqa da kóptegen sapaly ónimderdi shyǵaramyz. «Teńizshevroıl» úshin biz azyq-túlik, sýsyndar, dóńgelekter, arnaıy kıim men aıaqkıim, jeke tazalyq quraldaryn jetkizip bere alamyz. Sebebi, elimizde óndiriletin medısınalyq maskanyń 15%-y bizde shyǵady. Energetıka salasynda qyzmet kórsetetin «ASPK-19», «Promstroı-Energo» syndy belgili kompanıalarymyz bar. Sonymen qatar, aımaqtyń týrısik áleýetin kórsetetin kompanıalarymyz taǵy bar. Sondyqtan sizdermen tyǵyz qarym-qatynas ornatyp, birlese jumys isteı alamyz dep oılaımyn, – dedi.

Óz kezeginde Kevın Laıon «Teńizshevroıl» kompanıasy áriptesterimen berik baılanys ornatý jolynda bilikti mamandardy tájirıbe almasý úshin jiberýge nıetti ekendigin jetkizdi. Sebebi, aýylsharýashylyq ónimderin eksportqa shyǵarý múmkindigin bilý kásipkerler úshin óte qajetti tetik sanalady.

Osyndaı áriptestik kelisimi Jetisý jurtshylyǵyna damýdyń jańa kókjıegin asha túsedi.