Qazaq óneriniń jaryq juldyzy, KSRO-nyń halyq artisi, KSRO Memlekettik syilyǵynyń laýreaty, Qazaqstannyń Eńbek eri Asanáli Áshimovtiń 85 jyldyq mereitoiy aiasynda Óskemenge gastroldik saparmen kelgen «Jańa ǵasyr» ujymy kórermen nazaryna tórt spektakl usyndy dep jazdy "Didar" basylymy.
«Jańa ǵasyr» – jas teatr. Teatr menedjeri Salamat Óteshovtiń aitýynsha, teatr 2018 jyly Asanáli Áshimovtiń jetekshiligimen Almaty qalasy ákimdiginiń qoldaýymen «Almaty áýenderi» mekemesi janynan qurylǵan.
– Biyl teatr jáne kino akteri, ańyz adam Asanáli Áshimov aǵamyz 85 jasqa tolyp otyr. Teatr ujymy osy toidy respýblika aýmaǵynda toilap, sol toidy halyqpen birge atap ótýdi jón kórdi. Qazir mereitoi aiasynda Almaty qalasy mádeniet basqarmasynyń qoldaýymen elimizdiń túkpir-túkpirin gastroldik saparmen aralap júrmiz. Saparymyzdy Jambyl oblysynan bastadyq.
Sodan keiin Ońtústik Qazaqstan, Shymkent, Qyzylorda, Aqtóbe, Oral, Atyraý, Aqtaý oblystarynda jalǵastyrdyq. Aldaǵy bir aida Astana, Pavlodar, Kókshetaý, Taldyqorǵan sapary tur. Shyǵys halqymen kezdesýge Asanáli Áshimovtiń ózi keldi, – dedi teatr menedjeri Salamat Óteshev.
Bir atap óterligi, «Jańa ǵasyr» teatrynyń akterleri birge oqyǵan kýrstas, dostar eken.
– Joǵary oqý ornyn bitirgenimizge bes jyl boldy. Bitirgen jyly barlyǵymyz osy teatrǵa jumysqa ornalastyq. Sodan beri birgemiz. Eshkim eshqaida ketken joq. Teatrdyń negizin qalaǵan qyz-jigitter áli kúnge deiin osy teatrda eńbek etip kelemiz, – deidi Salamat Óteshev.
«Jańa ǵasyrlyqtar» Shyǵysqa tórt qoiylym ákelipti. Birinshi kúni kópshilik qaýym álemge tanymal «Korol Lev» shyǵarmasy men álemdik klassikalyq týyndy Iogann Shtraýstyń «Jarqanat» poetikalyq komediiasyn, ekinshi kúni osy teatrdyń akteri ári rejisseri Eldar Tashkenbaidyń joǵary synyp oqýshylary arasyndaǵy myzǵymas dostyq pen alǵashqy móldir sezim týraly syr shertetin «Sońǵy qońyraý» poetikalyq komediiasyn, sondai-aq aqyn, dramatýrg Baqyt Bedelhannyń Asanáli Áshimovtiń ómirine negizdelgen «Taǵdyr taqtasy» atty qoiylymdy tamashalady.
Spektakl sońynda sahnaǵa Júrsin Ermannyń sózine jazylǵan A.Qorazbaevtyń «Jan balam» ánin shyrqap Asanáli Áshimovtiń ózi shyqty. Zalda jinalǵan qaýymǵa bir aýyz jyly lebizin bildirdi.
– Qazaq bolyp týǵanyma qýanamyn. Ásirese, onyń ónerin qýǵanyma qýanamyn. Sahnadan, ekrannan jaqsy keiipkerdi jasap, ómirge qaita týa alam. Qazaǵymnyń keń baitaq jerine qýanam. Kirlengen kóńilimdi taza aýamen jýa alam. Basyma qandai qaiǵy-qasiret túspesin, belimdi bekem býa alam, – dep óleńdetken akter Shyǵys jurtyna shynaiy alǵysyn jetkizdi.
– Bul – meniń ónerdi alǵashqy bastaǵan óńirim. Jiyrma jastaǵy kezimde osy óńirde «Asaý Ertis jaǵasynda» atty filmge túsken bolatynmyn. Elmen tanysyp, teatryn, ónerin kórip qaitqan edim sonda. Ol ómirimniń bastamasy edi. Sondyqtan da bul óńir maǵan árýaqytta ystyq, – degen Asanáli Áshimov ózi jetekshilik etetin teatr akterlerine de rizashylyǵyn bildirdi.
Kezdesý sońynda oblystyq mádeniet basqarmasynyń basshysy N.Ahmetjanov oblys ákimi atynan áigili akter men onyń jubaiyna shapan jaýyp, syi-siiapat tabys etti.
